Ministra Saúde, Odete Maria Freitas Belo. Imajen TATOLI/Egas Cristóvão

BAUCAU, 07 juñu 2021 (TATOLI)–Ministra saúde (MS), Odete Maria Freitas Belo, halo diskusaun ho Prezidente Autoridade munisípiu Baucau, Olívio ‘Bou lesa’ Freitas, relasiona ho identifikasaun fatin ba pasiente pozitivu COVID-19 ho kategoria grave iha munisípiu Baucau.

“Ami ko’alia kona-ba transporte, fatin izolamentu inklui fatin ICU, tanba agora ho kazu ne’ebé aumenta, bainhira iha kazu grave ruma ospitál rejionál Eduardo Ximenes (HorEX, sigla portugés) bele fó atensaun, tanba ne’e koko atu identifika fatin ruma atu haree ba kazu grave ne’ebé karik akontese iha Baucau,” Ministra Saúde dehan iha salaun admistrasaun munisípal Baucau Villa nova, segunda ne’e.

Governante ne’e dehan, nia parte hamutuk ho Diretór Servisu Saúde munisípiu inklui Autoridade Baucau buka identifika fatin atu kondisiona pasiente sira.

“Karik iha pasiente ruma mak ho COVID-19 no presiza opera, liu-liu inan isin-rua sira ne’ebé mak tur-ahi,” nia akresenta.

Fatin alternativa iha rua ne’ebé sei iha faze identifika hanesan HorEX Baucau no  Sentru Saúde Ria-mare Bahu.

Aleinde ne’e, Ministra akonpanã serbisu iha admistrasaun munisipál Baucau ligadu ho kargu Prezidente Autoridade foun no observa mudansa ein termu intrega servisu hosi Diretór Servisu Saúde munisípiu sesante ba dirijente foun.

Aleinde ne’e, Ministra mós ko’alia kona-ba apoiu Autoridade munisípiu Baucau ba Servisu Saúde Munisipál.

Tuir dadus hosi Sala Situasaun, Sentru Integradu Jestaun Krize (CIGC, sigla portugés) iha segunda (07/06), kazu COVID-19 foun iha Baucau hamutuk rua, kazu ativu 229, rekuperadu 79, totál konfirmadu 308 no óbitu ida, ne’ebé daudaun ne’e ho klasifikasaun transmisaun hanesan kazu kluster.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here