CAC disemina Lei MPCC ba MOP, iha Hotel Novo Turismo, Lecidere, segunda (07/06). Imajen/Florêncio Miranda Ximenes

DILI, 07 juñu 2021 (TATOLI)-Ministru Obra Públika (MOP), Salvador Eugênio Soares dos Reis Pires, konsidera importante tebes atu funsionáriu públiku, liu-liu kargu xefia iha ministériu atu deklara riku-soin ba Komisaun Antí Korrupsaun (CAC, sigla portugés) atubele hasa’e prestasaun servisu, nune’e labele mosu konflitu interese.

“Ita halo semináriu atu CAC bele disamina no ezije ba kargu xefia-sira atu presta deklarasaun riku-soin atu labele iha konflitu interese bainhira presta servisu nu’udar funsionáriu públiku ou ajente iha instituisaun Governu,” Ministru Salvador hateten hafoin CAC disemina Lei Medida Prevensaun Antí Korrupsaun ba kargu xefia sira iha Hotel Novo Turismo, Lecidere, segunda ne’e.

CAC halo diseminasaun ba Lei Medida Preventiva no Kombate Korrupsaun (MPCC, sigla portugés), liu-liu lei númeru 7/2020, 26 agostu ba kargu xefia-sira iha MOP.

Governante ne’e dehan, lei ne’e ezije atu funsionáriu sira iha nível nasionál, tantu funsionáriu no orgaun titulár hanesan polítiku atu deklara riku-soin ba CAC hodi garante serbisu ho efisiénsia no efikásia hodi serví públiku.

“Ha’u hanoin lei ne’e kontribui maka’as liután kona-ba atu hasa’e ita-nia prestasaun servisu, liga ba serbisu obra públika ho serbisu báziku hanesan kualidade projetu sira tanba rigormente ita bele kontrola konflitu interese,” nia akresenta.

Nune’e, Ministru garante kargu xefia-sira presta deklarasaun riku-soin ne’e hanesan serbisu prestasaun infraestrutura bázika, liu-liu adminsitrativa efisiente liután no laiha konflitu interese mosu hosi jestaun projetu sira no ezekusaun orsamentál.

“Ha’u fiar katak ida-ne’e sei bele kesi no kontrola liután ita-nia funsionáriu públiku sira, liu-liu iha ministériu presta hela servisu implementasaun obra liuhosi osan povu ne’ebé mai hosi Orsamentu Jerál Estadu  (OJE),” nia hatutan.

Iha biban hanesan, Komisáriu CAC, Sérgio Hornay, informa, disenima lei MPCC entra ein vigór, liu-liu iha kapítulu daruak, ne’ebé ko’alia kona-ba deklarasaun rendimentu bens no interese, ne’ebé ezije funsionáriu no ajente traballadór iha kargu xefia-sira iha insitutusaun Estadu sira atu kumpre.

“Ohin, ami halo sensebilizasaun atu konfirma dúvida balun, ne’ebé liña ministériu hanesan MOP ne’ebé mak sei sujeita halo deklarasaun iha tempu badak ba iha autoridade kompetente,” Komisáriu ne’e afirma.

Iha lei ne’e, funsionáriu no kargu xefia-sira tenke kumpre deklarasaun sira atu hahú ka’er no to’o ramata atubele reuni instituisaun liu-liu ajente no funsionáriu instituisaun públiku atu buka kombate kriminalidade korrupsaun.

CAC hakarak mós atu kombate kriminalidade korrupsaun hodi garante boa governasaun, ne’ebé desizasaun sira tenke kontribui ba interese komum.

“Ita sei fornese formuláriu sira atu kada kargu xefia-sira ho nia agregadu família sira prenxe hodi kumpre. Ita iha  medida administrativu no represivu sei iha atubele hatán ba dezobidénsia ba implementasaun lei ne’e,” Komisáriu ne’e subliña

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here