Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 07 juñu 2021 (TATOLI)–Ministériu Negósiu Estranjeiru no Kooperasaun (MNEK) daudaun ne’e prepara hela ‘dokumentu viajen únika’ hodi fasilita timor-oan sira ne’ebé hela iha rai-li’ur maibé pasaporte inválidu ona.

“MNEK halo despaisu ida hodi prepara dokumentu viajen únika (travel document), nune’e bainhira sidadaun sira-nia pasaporte mate, bele uza dokumentu ne’e hodi halo viajen, hanesan hirak ne’ebé iha Inglatera, Portugal, Korea Súl, bele uza de’it dokumentu viajen únika no servisu migrasaun bele autoriza,” Ministra Negósiu Estranjeiru no Kooperasaun, Adaljiza Albertina Xavier Reis Magno, informa, hafoin reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Antes ne’e, MNEK hamutuk ho Ministériu Justisa (MJ) haruka ona karta ba nasaun hotu atu rekoñese nafatin dokumentu timor-oan ne’ebé inválidu ona.

“Ami ho Ministériu Justisa haruka ona nota verbál ba nasaun hotu, atu husu kompreensaun ba timor-oan sira-nia dokumentu hanesan pasaporte no Billete Identidade ne’ebé kaduka ona,  atu rekoñese nafatin,” nia akresenta.

Nia dehan, daudaun ne’e Governu Timor-Leste nafatin rekoñese sidadaun estranjeiru sira ne’ebé mak hela iha Timór maibé dokumentu inválidu ona.

“Ita mós halo ba sidadaun sira hosi nasaun seluk iha ne’e, katak sidadaun estranjeiru ne’ebé iha Timór bainhira sira-nia viza, pasaporte no dokumentu ruma mate, ita la deporta sira no bele hela iha ne’e nafatin no rekoñese, tanba ne’e ita husu nasaun seluk atu rekoñese nafatin timor-oan sira no autoriza bele halo movimentu bá-mai,” nia hatutan.

Estensaun dokumentu ofisiál sira ne’e lei la fó dalan, tanba ne’e Governu haruka karta ida hodi rekoñese nafatin hanesan dokumentu viajen únika  bele uza bainhira hakarak halo viajen, tanba lei hateten atu halo pasaporte foun tenke halo iha Timór.

Jornalista: Antónia Gusmão

Editora: Julia Chatarina

1 KOMENTÁRIU

  1. Obirgadu ba MNEK nia esforsu tomak.

    Maibe, Oinsa ami estudante iha Bangladesh bele accessu? no iha karta ruma para ami hatene ka lae? Tanba ami mos iha problema PASSAPORTE MATE antes ami nia estudu hotu.

    Espera bele hetan mensajem ne’e lalais. No simu resposta lalais.

    Husi,
    Novita Da Costa

Leave a Reply to Novita Da Costa Cancel reply

Please enter your comment!
Please enter your name here