Koordenadora APEDA iha Timor-Leste, Elisabeth Lino de Araújo, entrega nesesidade bázika ba membru sindikatu KSTL, iha sede Bemori, segunda (07/06). Imajen TATOLI/Francisco Sony

DILI, 07 juñu 2021 (TATOLI)–Konfederasaun Sindikatu Timor-Leste (KSTL) sei distribui nesesidade bázika ba profesór no komunidade hamutuk 653, ne’ebé hetan impaktu hosi dezastre naturál ne’ebé akontese iha abríl foin lalais ne’e.

Tuir Vise Prezidente KSTL, Francisco da Costa Fernandes, sasán hirak ne’e mai hosi doasaun Sindikatu Traballadór Austrália.

“Sindikatu sira esforsu atubele buka parseiru sira hanesan movimentu Sindikatu Austrália, atu fó ajuda umanitária ba profesór no komunidade hamutuk 653, ne’ebé identifika sai vítima inundasaun, tanba ne’e iha loron 07 maiu, Sidikatu Austrália sira halo konsertu boot iha Austrália hodi hetan osan AU$16.000, ho nune’e apoiu mai Sindikatu Timor-Leste liuhosi sira parseiru iha Timor-Leste hanesan Agricultural and Processed Food Products Export Development Authority (APEDA),” Vise Prezidente KSTL, Francisco da Costa Fernandes, informa iha edifísiu KSTL, Bemori, segunda ne’e.

Tuir Francisco da Costa, KSTL sei distribui nesesidade bázika ne’e fazeadamente tanba tenke kumpre distánsiamentu fíziku.

“Ohin loron ne’e kuaze ema 150 to’o 200 maka bele hetan,” nia akresenta.

Iha biban hanesan, Profesora Alzira Menezes, agradese ba Sindikatu Austrália tanba bele apoia ona profesór no komunidade sira, maski nesesidade ne’e oituan maibé signifikante tebes.

Sasán sira ne’ebé KSTL distribui ba kada ema mak hanesan foos kilograma 20 saku ida, mina tein masa kiik ida, manu-tolun no deterjente.

Dadus ikus hatudu katak, família afetadu inundasaun hamutuk 33.835, ne’ebé númeru mai hosi munisípiu hotu no ema mate hamutuk 44.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here