Produtu Cesta Bázika iha bote-laran Imajen TATOLI/Antónia Gusmão

BAUCAU, 07 juñu 2021 (TATOLI)–Xefi suku Tirilolo, postu admistrativu Baucau Villa, munisípiu Baucau, Ricardo Ernesto Belo, hateten aldeia lima hosi aldeia neen, ho totál populasaun hamutuk 9.789, simu ona Cesta Bázika.

“Populasaun ne’ebé simu ona Cesta Bázika hamutuk aldeia lima hanesan Osso-ua, Lialailesu, Parlamento, Caicido no Betulale, maibé ida seidauk mak aldeia Lutumuto,” Líder komunitáriu ne’e informa ba Agência TATOLI, iha ninia rezidénsia, Tirilolo, segunda ne’e.

Notísia relevante: Distribuisaun Cesta Bázika iha territóriu tomak kuaze konklui

Nia dehan, populasaun iha aldeia Lutumuto hamutuk 3.898 mak seidauk simu Cesta Bázika, maibé iha tempu badak, kompañia ne’ebé responsável sei distribui ba abitante hodi finaliza iha suku Tirilolo.

Xefe suku Tirilolo, Ricardo Enersto Belo. Imajen/Espesiál

“Hau sente distribuisaun produtu ne’e bele ajuda ona komunidade iha aldeia lima ne’ebé simu ona,” nia akresenta.

Tuir Ricardo Ernesto, durante distribusaun ai-han iha suku Tirilolo mosu mos reklamasaun balun hosi populasaun aldeia Betulale hamutuk uma-kain haat no aldeia Caicido hamutuk ema na’in-30 resin, nune’e nia parte alista no sei hato’o ba admistrasaun postu hodi submete ba ministériu implementadór.

Tuir dadus populasaun Tirilolo hamutuk 9.789 hosi aldeia neen hanesan Betulale 2.980, Caicido 849, Lialailesu 728, Lutumuto 3.898, Osso-ua 768, Parlamento 566, hosi totál uma-kain 1.702.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan produtu ai-han ho valór $25, ba fulan-rua.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here