Primeiru-Ministru no Ministru Interiór, Taur Matan Ruak, hamutuk ho Vise-Ministru Interiór, António Armindo, Komandante Jerál PNTL, Komisáriu Faustino da Costa, inklui Segundu Komandante, Komísariu Mateus Fernandes, hallo enkontru iha Rezidénsia Farol, segunda (07/06). Imajen TATOLI/Egas Cristóvão

DILI, 07 juñu 2021 (TATOLI)Ministériu Interiór (MI) daudaun ne’e seidauk iha hanoin no halo diskusaun hamutuk ho Komandu Polísia Nasionál Timor-Leste (PNTL) hodi halo reforma ba instituisaun ne’e rasik, maski mosu preokupasaun barak hosi públiku relasiona ho atuasaun membru balun iha terrenu.

“Atu reforma instituisaun PNTL ne’e kompeténsia Ministru Interiór, maibé iha enkontru entre Ministru interiór, Komandante Jerál inklui Vise rasik seidauk ko’alia kona-ba reforma instituisaun PNTL, maibé ami ko’alia kona-ba oinsá atu hadi’a instituisaun no lori membru sira servisu ho profisionál,” Vise Ministru Interiór, António Armindo, hateten hafoin ramata reuniaun ho Primeiru-Ministru (PM) no Ministru Interiór, Taur Matan Ruak, iha Rezidénsia Farol, segunda ne’e.

Notísia relevante: ORHF husu Governu reforma PNTL

Governante ne’e dehan, nia parte rasik seidauk bele fó komentáriu relasiona ho deklarasaun hosi públiku ne’ebé husu Governu liuhosi MI atu reforma PNTL.

“Ministériu Interiór ninia papél mak oinsá atu dezenvolve institusaun PNTL sai instituisaun ida ne’ebé profisionál, hakbesik ba povu, no instituisaun ida ne’ebé bele sai amigu di’ak hodi serví povu no nasaun. Tanba ne’e maka agora hanoin liután atu dezenvolve instituisaun di’ak liután, kontinua fó formasaun ba membru, haree bem estar, no tenke hadi’a sira-nia moris,” nia hatutan.

Kona-ba aktu membru Polísia ne’ebé konsege halo lakon ema na’in-rua nia vida no ida kanek todan, Vise-Ministru konsidera ne’e aktu individuál.

“Públiku kestiona katak PNTL halo problema, maibé atu dehan katak ne’e oknum mak halo krime ne’e, tanba ne’e ha’u, Primeiru-Ministru, no Komandante Jerál, ami lamenta atitude oknum ne’e no ami la kontente haree ida ne’e, tanba ne’e kazu sira envolve membru, ami sei haree no sé mak sala nia tenke kumpre,” governante ne’e subliña.

Vise-Ministru dehan, iha Konstituiasaun, hateten katak PNTL nia dever mak atu serví povu, proteje povu no implementa lei no ordem, tanba ne’e tenke hatuur didi’ak.

Dadaun ne’e, membru PNTL iha ona 3.000 resin ne’ebé destakadu iha eskuadra no postu seguransa sira, inklui ofisiál polísia suku iha territóriu tomak.

PNTL rasik sei menus rekursu umanu hodi reforsa instituisaun polísia liu-liu Ofisiál Polísia Suku (OPS) no Polízia Tránzitu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here