iklan

NASIONÁL, HEADLINE, LEI

Fulan ne’e, CAC konklui faze alistamentu dadus kargu xefia

Fulan ne’e, CAC konklui faze alistamentu dadus kargu xefia

Komisáriu CAC, Sérgio Hornay. Imajen TATOLI/António Gonçalves

DILI, 07 juñu 2021 (TATOLI)-Komisáriu Komisaun Antí Korrupsaun (CAC, sigla portugés), Sérgio Hornay, hateten, parte komisaun haruka ona karta ba liña ministériu, insitutisaun autonómu, Prezidénsia Repúblika no Parlamentu Nasionál, hodi halo arrolamentu (alistamentu) deklarasaun riku-soin no bens interese hosi kargu xefia sira.

“Ita halo ona arrolamentu inisiál, ne’ebé kuaze insitituisaun tomak ne’ebé mak sujeita hanesan insititusaun direta ka indireta sira, ezekutivu no insitituisaun outonómu, to’o iha fulan juñu ne’e ita konklui ona no ita sei halo serbisu, nune’e tama faze daruak hanesan preta deklarasaun rendimentu no sasán hosi  deklarante sira hotu,” Komisáriu CAC informa iha ámbitu diseminasaun Lei Medida Preventiva no Kombate Korrupsaun (MPCC, sigla portugés), iha Hotel Novo Turismo, Lecidere, Dili, segunda ne’e.

Iha faze dahuluk alistamentu, CAC husu ba diresaun rekursu umanu hosi kada ministériu no instituisaun outónomu sira, atu rekolla dadus kargu xefia no funsionáriu ne’ebé sai resposável direta no indireta sira.

Tuir Komisiáriu, arrolamentu ho objetivu atu hatene kargu xefia sira iha instituisaun Estadu, nune’e bele presta riku-soin ba CAC hodi bele kombate kriminalidade korrupsaun iha Timor-Leste.

“Ita bele hatene kargu xefia iha liña ministeriál hira, liu-liu iha Prezidénsia Repúblika no  Parlamentu Nasionál, inklui ema sira ne’ebé iha dependénsia ekonómika ba hirak ne’ebé mak sujeita ba deklarasaun ho ninia membru agregadu família inklui oan,” nia akresenta.

Lei númeru 7/2020, 26 agostu kona-ba MPCC, tama ona ein vigór iha 22 fevereiru tinan ne’e.

Notísia relevante: Prezidente Repúblika promulga lei MPKK

Lei MPCC, iha kapitulu II, artigu 27 to’o artigu 58, kona-ba Regime de Declaração de Redimentos, Bens e interesse.

Dirijente ne’e afirma, iha insititusaun hanesan Servisu Rejistrasaun no Verifikasaun Emprezariál  (SERVE) no Ministériu Justisa (MJ) hatama ona arrolamentu kargu xefia, enkuantu ba institusaun seluk iha karta ofisiál hosi CAC atu fó dadus ne’ebé hetan remunerasaun direta no indireta hosi Estadu.

“Ita iha ona 70-resin membru agregadu família, tantu oan sira halo deklarasaun no ita halo atualizasaun ho sistema eletróniku  offline, nune’e ita bele identifika kargu xefia nia deklarasaun bens sira,” nia tenik.

Nune’e, kargu xefia ne’ebé lakohi kontribui ba implementasaun lei ne’e, maka sei iha medida reprezivu hanesan administratuivu no aplikasaun koima.

“Sé mak halo empedementu, sei hetan konsenkuénsia katak nia lakohi kargu no posizaun ida nia asume, entaun nia tenke husik tanba ema barak iha li’ur mak sei bele okupa ka prenxe kargu sira ne’e,” nia fó hanoin.

Maski nune’e, CAC hasoru dezafiu balun durante implementasaun lei ne’e tanba rekursu umanu internál no deklarante barak mak sei dúvida, maibé instituisaun independente ne’e kontinua buka komprende substánsia lei.

Jornalista: Florêncio Miranda Ximenes

Editora: Julia Chatarina

iklan
iklan

One Comment

  1. Nudar povu kiik ida, hau apresia tebes CAC nia servisu hodi halo lei konaba deklarasaun rendimentu, bens no interese ba kargu xefia ne’e dalan ne’ebe muito bem. passo por passo hakat neneik ho idea ne’ebe furak sei lori ita nia RAI doben ba dalan NAROMAN hodi nune povu kiik hanesan ami mos bele sente NAROMAN ne’e. Nasaun ida wainhira nia povu hetan NAROMAN kuandu KORUPSAUN menus ou LAIHA. sujere katak wainhira hetan tiha lista tenke mos avalia kada tinan ou kada tinan 2 dala ida. ba prosesu kontinuasaun. obrigadu wa’in no abraco forte. GOD Blessed us.

Leave a Reply

iklan
error: Content is protected !!