DILI, 07 juñu 2021 (TATOLI)—Pasiente rekoperadu COVID-19 ho naran Zina Alves, husu ema hotu atu kuidadu saúde tanba virus ne’e iha duni no perigu tebes ba vida.
Pasiente rekoperadu ne’e husu mós atu tau konfiansa ba médiku-sira tanba ho sira-nia atendimentu iha izolamentu mak salva pasiente barak-nia vida.
Notísia relevante:COVID-19: sasin hosi pasiente rekoperadu iha Vera Cruz
“Moras ne’e eziste no perigu tebes, ne’ebé bele kona no foti ita-nia moris lalais de’it. Tanba ne’e, tenki kuidadu saúde no tau fiar ba ita-nia médiku-sira,” Zina Alves konta ninia esperiénsia ba jornalista Agência Tatoli iha rezidénsia Ai-mutin, segunda ne’e.
Zina Alves tama iha izolamentu Vera Cruz iha 14 no alta iha 24 maiu, tanba halo tratamentu rutina ho disiplina, hetan tratamentu di’ak hosi médiku sira, iha dadeer, meiudia, loraik no kalan molok deskansa.
Buat ne’ebé nia sente dahuluk bainhira detetadu pozitivu COVID-19 maka, vontade atu han laiha, senti kolen hela de’it, isin baruk, inus metin, me’ar-maran no dada-iis susar, maski antes ne’e laiha istória kona-bá moras asma.
Ho ida-ne’e maka, nia transferida ba izolamentu Vera Cruz no médiku-sira atende ho di’ak tebes até rekoperadu mós médiku-sira kontinua kontaktu, hodi husu tuir kona-bá novidade saúde.
Tanba ne’e, nia husu ba ema hotu atu bainhira sente síntoma hirak-ne’e labele tauk, maibé tenke hakbesik an ba fasilidade saúde hodi hetan lalais asisténsia, nune’e salva an hosi virus ne’e.
To’o ohin, Sala Situasaun, Sentru Integradu Jestaun Krize (SIJK), rejista kazu pozitivu 24, rekoperadu 194 no kazu ativu 2.232.
Jornalista: Felicidade Ximenes
Editór: Cipriano Colo
