Vise-Ministru Saúde, Bonifácio Maucoli dos Reis. Imajen Tatoli/Egas Cristovão.

DILI, 07 juñu 2021 (TATOLI)—Vise-Ministru Saúde, Bonifácio ‘Maucoli’ dos Reis, konsidera ai-han seguru nu’udár asuntu importante ne’ebé presija ema hotu atu tau atensaun no responsabiliza, hodi garante futuru saudável.

Bonifácio ‘Maucoli’ dos Reis  hato’o konsiderasaun ne’e iha ámbitu selebrasaun Loron Mundiál Ai-han Seguru, 07 juñu, ho tema dedikadu, ‘Ai-han seguru hahú agora, ba futuru ne’ebé saudável’.

Notísia relevante:Loron ai-han mundiál promove konsiénsia no nesesidade hetan aihan saudável

Vise-Ministru Saúde ne’e esplika, asembleia Jerál Nasaun Unida, deklara loron ne’e nu’udár loron dedikadu ba ai-han seguru, ho objetivu atu fanun ema hotu, hodi haree hikas katak, ai-han seguru asuntu ida-ne’ebé esensiál, maibé ladún hetan atensaun forte.

“Ai-han ne’ebé la seguru, responsabiliza ba kauza moras oioin iha mundu, no bele kauza risku ba defisiénsia nutrisaun no mortalidade,” Vise-Ministru Saúde hateten liu hosi komunikadu ne’ebé Agência Tatoli asesu, segunda ne’e.

Nia hatutan, grupu sira-ne’ebé vulnerável no risku aas liu maka, labarik menus hosi tinan lima, inan isin-rua, inan fó-susu, idozu no sira-ne’ebé ho imuno-komprometidu.

Governante ne’e konsidera ai-han la seguru bele aumenta náha ba taxa malnutrisaun, tuir dadus hosi peskiza ba ai-han no nutrisaun tinan 2020 ne’ebé hatudu katak, Timor-Leste nu’udár nasaun ida ho númeru rejistadu ba kazu malnutrisaun aas ho prevalénsia hosi raes badak maka 47.1%.

“Hosi persentajen ida-ne’e 30.2% mak raes badak moderadu. Raes badak grave 16.9%. Prevalénsia hosi isin krekas maka 8.6% ho 7.1% mak krekas maran moderadu no 1.5% mak grave. Prevalensia todan menus mak 32.1% ho 24.6 mak todan menus moderadu, no todan-menus grave 7.5%,” nia subliña.

Aleinde ida-ne’e, kazu envenenamentu ai-han aumenta kada tinan, ho totál kazu kumulativu rejistadu 629 inklui mate.

Parte MS hakarak fó atensaun katak, kazu ida-ne’e bele aas liu-tán liuliu durante Pandemia COVID-19 no dezastre naturál ne’ebé akontese iha tinan ida-ne’e, lori estragu ba komunidade nia uma, toos, natar, balada haki’ak.

Hosi parte seluk, falta bee moos, kanalizasaun bee ne’ebé kontaminadu sei fó risku ba komunidade, partikularmente ba grupu vulnerável sira.

Ho kondisaun sira-ne’e hotu, MS konsidera difísil atu mantein serbisu la hó interrupsaun ba atividade rutina-sira, hanesan inspesaun ba iha restaurante, fa’an fatin ba retallu ai-han, supermerkadu, sertifikasaun ba produtu esportadu, kontrolu ba ai-han importadu, monitorizasaun no vijilánsia ai-han seguru ba korrente ai-han, jestaun surtu ba insidente ai-han no komunikasaun kona-bá problema ai-han seguru ba públiku.

Tuir MS katak, dezafiu sira-ne’e bele hamenus bainhira ema idak-idak rekoñese katak, ai-han seguru sai ema hotu-nia responsabilidade.

Tanba ne’e, Bonifácio ‘Maucoli’dos Reis  hakarak bolu atensaun ba parte relevante, lejisladór, distribuidór, manufaktura, akademista no konsumidór-sira, katak, ema idak-idak nia kontribuisaun, kolaborasaun no halo-tuir ka implementa padraun ba prátika ai-han seguru ho di’ak sei asegura nia emar, ekonomia no planeta ne’ebé saudável.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here