Komunidade Tasi-tolu hato’o obrigadu ba Kay Rala Xanana Gusmão no ema hotu-hotu, iha serimónia agradesimentu kulturál ba normalizasaun bee inklui hadi’a estrada hale’u área Masin-Lidun, sábadu (05/06/21). Imajen facebook.

DILI, 06 juñu 2021 (TATOLI)—Líder nasionál, Kay Rala Xanana Gusmão, husu komunidade atu promove sentidu solidariedade iha sosiedade, bainhira hasoru kualkér situasaun difísil, nune’e hamutuk korre an hosi problema.

Kay Rala Xanana Gusmão husu ne’e iha serimónia enseramentu kulturál, ne’ebé organiza hosi komunidade aldeia hamutuk 12 iha Tasi-tolu, nu’udár serimónia agradesimentu ba líder karismátiku ne’ebé durante fulan-rua, organiza hodi normaliza bee inklui hadi’a estrada hale’u área Masin-Lidun.

Notísia relevante:Xanana mobiliza kompañia lori mangeira hasai bee iha Lagoa Tasi-Tolu

Eis Primeiru Ministru ne’e observa no rekoñese katak, durante fulan-rua iha Tasi-tolu komunidade iha área ne’e kontribui makaas tantu labarik, joven feto-mane, ferik no katuas-sira.

Kay Rala Xanana Gusmão konsidera realidade ne’e, nu’udár sentidu solidariedade komun ida hosi komunidade ho objetivu ida, atu bele hakat-sai hosi dezastre naturál, ne’ebé akontese iha 04 abríl 2021.

“Ha’u tenke dehan ba imi katak, hotu-hotu ne’ebé serbisu iha Tasi-tolu durante fulan-rua ho voluntariamente, la simu osan. Ida-ne’e mak hatudu katak, Timoroan bainhira haree ema seluk iha susar nia-laran ba ajuda hasai buat ruma no hamoos buat ruma. Ida-ne’e mak tenke sai kultura Timor-nian liuliu lolo-liman ba malu lalika husu rekompensa,” Kay Rala Xanana Gusmão hateten iha Masin-Lidun, sábadu ne’e.

Eis Prezidente Repúblika ne’e lamenta oitoan ho ema balun ne’ebé fa’an bee moos iha situasaun difísil, maibé laiha buat ida tanba buat hotu-hotu la’o di’ak ona no komunidade bele asesu ona estrada ba sira-nia hela fatin.

Maski la temi detalla kona-bá karreta hira mak alugadu, maibé Xanana Gusmão mós informa ba komunidade 5.000-resin ne’ebé partisipa iha serimónia enseramentu ne’e katak, susesu ne’e la’ós gratuita, maibé normalizasaun ba bee no estrada tanba aluga ema-nia karreta.

Ikus liu, Xanana Gusmão espressa sentimentu kontente no agradese ba Maromak, tanba komunidade iha área ne’e bele korre an ona hosi situasaun difísil, hodi kontente hamutuk ho idaidak-nia família iha uma.

Apela ba joven-sira hakribi violénsia

Iha serimónia tara tais, líder karismátiku ne’e husu ba joven-sira iha área Tasi-tolu atu hakribi violénsia, hodi promove paz no harmonia iha komunidade-nia leet.

“Sé imi hadomi ha’u, hadomi malu, hadomi rai ne’e, ha’u kontente. Bainhira imi iha aldeia 12 outubru kompostu hosi bairru 12, joven-sira la baku-malu no la estraga-malu, ida-ne’e mak imi-nia agradesimentu boot ba ha’u no imi-nia tais ne’e iha folin,” Xanana Gusmão apela.

Xanana Gusmão hakarak atu joven-sira hadomi-malu, ka’er-metin sentidu solidariedade, unidade, kompreende-malu, iha problema karik tuur hamutuk ho katuas-sira no rezolve ho ulun malirin.

Antes serimónia, Xanana Gusmão hamutuk ho premiadu Nobel da Paz, José Manuel Ramos Horta, akompañadu hosi komunidade, hale’u área Masin-Lidun, hodi observa direta normalizasaun bee no estrada ne’ebé oras-ne’e komunidade utiliza ona ba movimentu.

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here