Reprezentante Feto kuda ai horis iha Suku Dare Aldeia Fatunaba, Sabadu (05/06). Imajen Tatoli/Francisco Sony.

DILI, 05 juñu 2021 (TATOLI)—VIII Governu Konstitusionál liuhosi Sekretáriu Estadu Ambiente (SEA), sábadu (05/06) ne’e selebra Loron Mundiál ba Ambiente hodi halo lansamentu ba atividade kuda ai-oan 1.000 resin iha Aldeia Fatunaba, Suku Dare, Postu Administrativu Vera Cruz, Munsípiu Dili.

Sekretáriu Estadu Ambiente (SEA). Deometrio Amaral de Carvalho. hateten objetivu hosi kuda ai-oan 1.000 iha Dare ne’e tanba loron ohin hola parte selebrasaun loron mundiál ambiente ho tema “Restaurasaun ba Ekosistema” ninian ne’ebé mundu tomak selebra.

Sekretáriu Estadu Ambiente, Deométrio do Amaral de Carvalho. Suku Dare, Aldeia Fatunaba Sabadu (05/06). Imajen Tatoli/Francisco Sony

“Loron ohin determina ambientál ninian ita selebra tema mundial “Restaurasaun ba Ekosistema” ho ninia tema nasionál mak “Investe ba Restaurasaun Ekosistema fó Moris ba Ita-nia Futuru Jerasaun”, entaun ita selebra ho atividade kuda ai-oan 1.000 resin iha Suku Dare,” Deometrio Amaral de Carvalho hateten ba jornalista-sira hafoin kuda ai-oan iha Suku Dare, sábadu ne’e.

Sekretáriu Estadu Ambiente (SEA) hili Dare kuda ai-oan iha sira-ne’e tanba haree ba fatin iha Dare ne’e estabelese koridór verde ne’ebé hasa’e reziliénsia Dili ninian hasoru dezastre sira iha inkluzaun klimátika ninian.

“Entaun, atividade ne’e Dare-oan sira ho Grupu Hadomi Natureza no Brigada Ambientál hamutuk estabelese pilotu ida-ne’e halo konservasaun kuda ai-horis ne’ebé iha tempu badak bele fó rendimentu ekonómia ba sira-nia família, maibé mós tempu naruk bele restaura ita-nia ekosistema,” nia dehan.

Ai-horis tipu ne’ebé ohin kuda iha Dare ne’e mak hanesan sabraka, rambutan, ai-nanas no kulu oan balun, ne’ebé kuda ba rai ektare ida.

“Ita kuda nune’e bele minimizaa sedimentasaun ba rai teen. Udan boot karik Dili labele simu sedimentasaun hosi rai teen sira-ne’ebé buras iha foho leten. Tanba asaun kiik-oan kuda ai-oan ne’e ninia objetivu mak restaura rai Dili nia bokur, restaura ekosistema, fó valór moris di’ak bele ba toos na’in sira,” nia dehan.

Atividade ne’ebé SEA hala’o koopera hamutuk ho Ministéreiu Agrikultór no Peska no hetan apoiu finanseiru hosi ETO hamutuk $10.000.

Entretantu Prezidente Komisaun D iha Parlamentu Nasionál, Antonino Bianco husu ba komunidade tomak iha Suku Dare, ne’ebé ohin kuda ona ai-oan iha toos laran ne’’e ba oin tenke kuidadu nune’e bele fó matak malirin ba rai ida-ne’e.

Reprezenta Deputadu Komisaun D Parlamentu Nasionál, Antoninho Binanco, kuda ai-horis Suku Dare Aldeia Fatunaba, Sabadu (05/06).Imajen Tatoli/Francisco Sony.

“Ha’u husu ba imi tenke proteje ai-oan ka ai-horis ne’ebé ohin kuda ona ne’e, kuidadu atu nune’e ita bele hetan benefísiu hosi ai-horis sira. Tanba ai-horis ne’ebé ohin ita kuda tuir dékada hahú hosi ohin 05 juñu 2021 to’o tinan 2030 sei fó matak ba Dare no fó bee ba ema sira-ne’ebé hela iha Dili,” nia hateten.

Iha fatin hanesan, Xefe Aldeia Fatunaba, Suku Dare, Postu Administrativu Vera Cruz, Amelia da Silva Barreto, hateten nia parte sente kontente tebes tanba Governu bele hili fatin Dare hodi kuda ai-oan nune’e bele fó matak fali ba Dare tempu tuir mai.

“Ha’u agradese tebes ba Governu liuhosi MAP, SEA, no sira seluk ne’ebé ohin mai halo serimónia kuda ai-oan. Ami sente kontente tanba ida sei la’o fó matak no buras de’it ba Dili maibé liuliu ba ami suku Dare ba futuru oin mai,” nia hateten.

Iha serimónia lansamentu kuda ai-hun ne’e hetan apoiu hosi emprezá ETO ho orsamentu hamutuk $10.000 no partisipante sira-ne’ebé partisipa iha atividade ne’e mak hanesan ajénsia internasionál UNDP, CI, Mercy Corps, Diretór Sekretáriu Estadu Protesaun Sivíl, Komisaun D, MAP ho hamutuk komunidade Suku Dare.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here