Traballadór timor-oan sa’e ona aviaun atu ba serbisu iha Korea Súl, iha Aeroportu Comoro, sesta (04/06). Imajen TATOLI/Francisco Sony

DILI, 05 juñu 2021 (TATOLI)-Traballadór nain 65 ne’ebé maka aranka sesta (4/5/2021) ho aviaun Air Asia, hafoin to’o iha  aeroportu  Kuala Lumpur Malázia, nain rua detetadu pozitivu Covid-19, tanba ne’e la konsege liu ba fatin destinasaun.

Livio dos Santos hanesan traballadór konta tuir, sira to’o iha aeroportu tuku 18.00 loraik no deteta nain rua pozitivu.

“Hafoin iha tuku 19.00 ami halo checking ba dokumentu sira no iha tuku 21.00 sira kontinua aranka ba korea no nain rua submete hela ba karantina iha Malázia”, haktuir Livio via WhatsApp ba Tatoli, ohin.

Diretór Nasionál Empregu Esteriór, Sekretaria Estadu Formasaun Profisionál Empregu (SEFOPE), Filomeno Soares, hateten  trabalhadór nain rua ne’ebé pozitivu atu  ba servisu fila fali iha Korea Súl, ne’e depende ba desizaun empregadór sira nian tanba data fixu atu simu trabalhadór sira iha loron 5 fulan ne’e.

“Sira hetan ona Covid-19 hanesan ne’e, alternativa rua bele kontinua viajen ba Korea ou bele mós fila fali mai Timor, tanba ne’e depende ba empregadór Korea nian ne’ebé atu foti nia, tanba hein sira iha loron 5 fulan ne’e”, dehan nia

Prosesu atu  servisu iha Korea, nia hatutan sistema ne’e ligasaun entre governu ho governu, agora kompaña ne’ebe atu foti ita nia traballadór ne’e nia halo ona kompromisu ho Estadu ida ba Estadu ida.

Maske nune’e, Governu liuhusi SEFOPE komunika ona ho embaxadór TL iha Kuala Lumpur no ajénsia aéreu ne’ebé tula traballadór sira.

“Prosesu ba oin atu hetan servisu ne’e kestaun ketak ida, importante mak ita salva ka proteje lai ita nia ema ne’e atu sira bele rekopera fali sira nia hanoin”, tenik nia.

Filomeno Soares dehan, informasaun ne’ebé simu husi  Airline katak traballadór nain rua ne’e sei iha karantina provizóriu iha aeroportu laran hodi hein ekipa sira buka fatin seluk hodi bele lori ba izolamentu, tanba dadaun ne’e mos Malázia aplika hela Lockdown.

Enkuantu traballadór sira seluk  nain 63 kontinua aranka ba Korea Súl no to’o ona iha aeroportu Inchong Korea Súl iha tuku 6.00.

Jornalista : Natalino Costa

Editór        : Cancio Ximenes

HAKEREK NO HATÁN

Please enter your comment!
Please enter your name here