Negosiante ne'ebé faan produtu lokál iha merkadu Villa Nova Baucau sente triste ho sasán la folin tanba impaktu hosi inplementasaun Serka Sanitária, Sabdu (05/06). Imajen Tatoli/Natalino Belo.

BAUCAU, 05 Juñu 2021 (TATOLI)—Implementasaun Serka Sanitaria (SS) no konfinamentu obrigatóriu iha munisípiu Baucau, afeta ba atividade ekonomia liu-liu ba negosiante produtu lokál sira-ne’ebé hala”o atividade faan no sosa sasán iha merkadu Villa Nova tanba laiha kompradór no rendimentu menus.

Notísia Relevante: Governu impoin serka sanitária iha Baucau no Viqueque to’o 29 marsu

Negosiante Domingas Filipe hateten, nia parte sente triste tanba pandemia COVID-19 ne’e halo rendimentu menus kompara ho antes Governu implementa serka sanitaria iha Baucau.   

“Ami negosiante triste tanba babain hanesan ne’e, la barak maibé loron ida ema hola $5 ba leten. Maibé, agora corona (COVID-19) tama halo ami nia osan inan mos la mai, lakon hotu tiha deit,” Domingas Filipe hateten ba Agência Tatoli, iha merkadu Villa Nova, Baucau, sábadu ne’e.

Tanba serka sanitaria, produtu lokál ne’ebé nia faan hanesan ai-dila, modo-tahan dodok leet de’it tanba laiha ema ida mak atu sosa.

“Sasán sira ami faan dodok hotu. Pelumenus movimentu netik maibé ema sira lahola ami-nia sasán to’o dodok hotu,” Domingas hateten.

Imajen Tatoli/Natalino Belo.

Antes ne’e produtu ne’ebé nia faan ne’e loron ida bele hetan rendimentu $5 ba leten maibé daudaun ne’e menus hosi $3, tanba movimentu ema hosi postu administrativu seluk la tama Baucau Vila inklui komunidade iha vila laran mós movimentu menus ba merkadu tanba tauk moras corona (COVID-19) ne”e.

“Ema tauk corona. Balun mai no balun la mai merkadu. Corona fó impaktu duni ba ekonomia no impaktu ba ami-nia rendimentu loro-loron nian,” nia dehan.

Observasaun Tatoli iha merkadu Villa Nova Baucau nota katak, produtu lokál hanesan modo, ai-fuan sira-nia folin hanesan babain maibé menus mak movimentu hosi ema ka kompradór sira atu sosa sasán.

Antes ne’e Governu liuhosi reuniaun Konsellu Ministru aprova rezolusaun hodi mantein impozisaun serka sanitária iha munisípiu sira hanesan Baucau no Viqueque durante loron hitu ne’ebé sei ramata iha loron 7 fulan Juñu 2021, tanba impaktu hosi propagasaun COVID-19.

Tuir dadus hosi Sala Situasaun, Sentru Integradu Jestaun Krize (SIJK), iha sesta (04/06) rejista kazu óbitu ida, pozitivu 89, rekoperadu 167 no kazu ativu 2.501.

Kazu kumulativu konfirmadu ne’ebe sura hosi 21 marsu 2020 to’o 04 juñu 2021 hamutuk 7.511. 

Hosi 03 juñu to’o 04 juu, teste ne’ebé Laboratóriu Nasionál Saúde halo hamutuk 893 PCR, ho detallu hanesan tuir-mai; vijilánsia sentinela 15, rastreiu ba kontaktu ka Contact tracing 46, Rastreiu Aleatóriu ka Random Screening 91, viájen sai-hosi serka sanitária hosi Dili 771, Viájen internasionál 32, follow up iha kuarentena 28.

Totál teste PCR ne’ebé halo iha 03 juñu iha Munisípiu-sira seluk, RAEOA no HNGV hamutuk 441 ho detalla hanesan tuir-mai, Maubisse 72, Maliana 43, Viqueque 38, Suai 59, Baucau 129, Ermera 28, RAEOA laiha no HNGV 72.

Notísia Relevante: Serka sanitária Dili, Bobonaro no Covalima kontinua to’o loron 14

Jornalista: Natalino Belo

Editór: Cancio Ximenes

HAKEREK NO HATÁN

Please enter your comment!
Please enter your name here