Pesoál saúde fó vasina AstraZeneca inan-feton ida iha Sentru Saúde Bairro Formosa, Dili, sesta, (21/05). Imajen TATOLI/António Gonçalves

BAUCAU, 05 juñu 2021 (TATOLI)—Responsável Pilar Rua (2) Risku no Komunikasaun Sala Situasaun Sentru Integradu Jestaun Krize (SS-SIJK) Munisípiu Baucau, Abrão Pinto informa,  segunda (07/06) semana oin ne’e SIJK sei implementa vasina AstraZeneca doze daruak nian ba sidadaun hamutuk 21.000-resin 

Notísia Relevante: COVID-19: Baucau rejista kazu pozitivu 40, rekoperadu 188 no akumuladu 302

Abrão Pinto hatutan, vasina AstraZeneca doze daruak nian ne’e prioridade liu ba pesoál liña frente no sidadaun ne’ebé hetan moras króniku, no idozu sira ho idade 60-resin ba leten no hafoin ne’e mak fó oportunidade ba sidadaun ho idade 18-50-resin.

“Agora daudaun, loron 07 juñu mai ne’e vasina doze daruak nian ba liña frente. Bainhira idozu sira-ne’ebé mai, ita mós komesa vasina daudaun ba sira. Dadus provizóriu sidadaun moras króniku, idozu sira no sidadaun idade 18-59 hamutuk 21.000-resin bazea ba dadus hosi sentru saúde sira hosi postu admistrativu neen (6), suku 59, aldeia 281 iha munisípiu Baucau,”  Responsável ne’e hateten ba Agência Tatoli iha nia knaar fatin, sabadu ne’e.

Nia infroma, munisípiu Baucau rasik hahu implenta vasina AstraZeneca doze dahuluk nian ba pesoál liña frente iha loron 12 abríl 2021 no ba sidadaun hamutuk na’in-2018.

Antes ne’e, tuir orientasaun hosi SIJK nasionál ba Administrasaun Munisipál Baucau atu halo kampaña nasional ba kombate COVID-19 ne’e haten susesu ekipa SIJK Baucau, pesoál saúde hamutuuk jo autoridade lokál sira tun ba terrenu hodi halo kampaña vasinasaun AstraZeneca ba komunidade iha suku sira iha Baucau laran tomak.

Tuir nia, totál pesoál saúde ne’ebé uluk introdús no hala’o kampaña vasina AsttraZeneca ba komunidade ne’e hamutuk na’in-65 tuir númeru suku ne’ebé pretense iha Munisípiu Baucau, tanba kada pesoál saúde responsáel suku ida hodi orienta iha suku ne’ebé nia haknaar-aan bá.

Kampaña ba vasina AstraZeneca hahú hala’o dahuluk iha loron 19 maiu, ba diretór eskola ensinu baziku, ensinu sekundária jerál no tékniku vokasionál sira iha munisípiu Baucau hamutuk na’in-35.

Iha loron 21-25 maiu, ekipa hala’o kampaña vasina AstraZeneca iha nivél Munisípiu, postu administrativu neen (Baucau Vila, Venilale, Vemasse, Baguia, Laga, no Quelicai) no finaliza tiha ona iha loron 02 juñu 2021.

Kampaña ne’e hala’o iha suku sira-ne’ebé hala’o ona advokasia mak hanesan suku Afaloikai, Ala-ua kraik, Uakala, Uailili, Buibau, Samalari, Gariuai, Bucoli, Ostico, Loilubo, Uatulari no Uaiga’e, Caicua inklui suku rua seluk iha postu Venilale.

“Ekipa sira tama-sai uma, fahe informasaun no fahe brosura ba komunidade sira, halo kompleitu dadus ne’ebé iha,” Abrão dehan.

Iha fatin seluk, Xefe Suku Tirilolo, Postu Administrativuu Baucau Vila, Munisípiu Baucau, Ricardo Enersto Belo, hateten nia parte koopera ona ho ekipa SIJK no pesoál saúde sira atu rekolla populasaun nia dadus iha suku ne’ebé nia lidera.

“Antes ne’e ha’u koopera ho pesoál saúde sira bainhira to’o iha suku Tirilolo hodi rekolla dadus inklui hala’o kampaña vasina AstraZeneca ba komunidade atu simu vasina,” Ricardo Ernesto Belo hateten ba Agência Tatoli via telefónika, sábadu ne’e.

Tuir dadus hosi Sala Situasaun, Sentru Integradu Jestaun Krize (SIJK), iha sesta (04/06) rejista kazu óbitu ida, pozitivu 89, rekoperadu 167 no kazu ativu 2.501.

Kumulativu kazu konfirmadu sura hosi 21 marsu 2020 to’o 04 juñu 2021 hamutuk 7.511. Hosi 03 juñu to’o 04 juu, teste ne’ebé Laboratóriu Nasionál Saúde halo hamutuk 893 PCR, ho detallu hanesan tuir-mai; vijilánsia sentinela 15, rastreiu ba kontaktu ka Contact tracing 46, Rastreiu Aleatóriu ka Random Screening 91, viájen sai-hosi serka sanitária hosi Dili 771, Viájen internasionál 32, follow up iha kuarentena 28.

Notísia Relevante: Sidadaun 76.683 simu ona vasina AstraZeneca doze dahuluk

Jornalista: Natalino Belo

Editór: Cancio Ximenes

HAKEREK NO HATÁN

Please enter your comment!
Please enter your name here