Membru Organizasaun Sagrada Família (OSF) hala’o konferénsia imprensa ba kazu Ajente PNTL tiru mate sidadaun na’in-rua iha Lahane. Imajen Tatoli/Arminda Fonseca.

DILI, 05 juñu 2021 (TATOLI)—Organizasaun Sagrada Família (OSF), husu instituisaun seguransa hanesan Pólisia Nasioná Timor-Leste (PNTL) tenke mellora membru sira-nia servisu iha terrenu no evita fó arma ba membru sira lori fila ba uma, nune’e membru-sira labele utiliza kilat iha problema sivíl no komunitáriu.

Notísia Relevante: Kazu Lahane, Komandu PNTL halo ona asaun prosedimentu dixiplinár no kriminál

Sekretáriu Jerál OSF, Antero Benedito da Silva, hateten instituisaun seguransa no defeza hanesan PNTL no FALINTIL-Forsa Defeza Timor-Leste (F-FDTL) ne’e, iha valor ne’ebé boot atu bele prevene violénsia liuliu hasoru sidadaun ne’ebé mukit liu.

Se sitausaun sira hanesan kazu tiru mate sidadaun na’in-rua (2) iha Lahane ne’e mak kontinua akontese bebeik, mak institusaun PNTL bele lakon ninia autoridade hanesan respeitu maske iha podér tanba iha kilat no iha lei no orden atu asegura no proteje nia sidadaun sira.

“Bainhira lakon ona autoridade hanesan respeitu mak hosi sidadaun sira-nia fiar ba instituisaun PNTL mós menus, entaun tendénsia violénsia sei mosu barak iha ita-nia nasaun. Tanba ne’e, PNTL nu’udár instituisaun Estadu tenke haree didi’ak aktu ajente PNTL ne’ebé hatudu atitude la tuir lei no orden PNTL nian ne’e, tenke prosesa tuir dalan legál,” Anterio Bendito da Silva hateten ba jornalista-sira liuhosi konferénisia imprensa iha Sede Nasionál OSF, Avenida de Prezidente Nicolau Lobato, Fatuhada, Dili, sábadu ne’e.

Iha biban hanesan, Portavoz Organizasaun Sagrada Família, Abrão Pereira hateten OSF husu instituisaun PNTL presiza evita utiliza kilat, tanba akontesimentu iha Lahane ne’e ajente PNTL tiru mate Mateus de Deus ho nia oan no família ida kanek todan ne’e ho kilat povu nian.

 “Aktu ajente Polísia ne’ebé hamate luta na’in ida ho nia oan nia vida, ami sente triste tebes. Tanba ne’e, husu ba instituisaun Komandu PNTL atu evita fó kilat ba membru-sira lori ba uma nune’e labele utiliza kilta iha problema sivíl no komunitáriu,” Abrão Pereira hateten.

Tanba PNTL ninia papél loloos mak tenke serví no proteje povu ida-ne’e mak xave ne’ebé tula hela ba PNTL sira-nia kbaas, entaun akontesimentu sira-ne’e nu’udár reflesaun negativu ida ba dixiplina, formasaun polisiál, profesionalizmu iha instituisaun PNTL nia laran.

Notísia Relevante: Família matebian husu MP prosesa lalais kazu Lahane ho sériu

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here