Eis Primeiru-Ministru, Kayrala Xanana Gusmão, simu doasaun hosi Asosiasaun Xineza Timor-oan iha NSW, Austrália, hodi distribui ba vítima dezastre naturál. Imajen TATOLI/Florêncio Miranda Ximenes

DILI, 04 juñu 2021 (TATOLI)--Líder Nasionál no Eis Primeiru-Ministru (PM), Kay Rala Xanana Gusmão, agradese ba Asosiasaun Xineza Timor-oan iha New South Wales (NSW), Austrália, tanba liuhosi Asosiasaun Komersiál Komunidade Xineza iha Timor-Leste (ACCCTO, sigla portugés) bele fó doasaun ai-han atu distribui ba abitante afetadu dezastre naturál.

“Ha’u agradese no apresia tebes ba ita-nia maluk komunidade Xineza Timor-oan iha Sidney, maski iha Austrália infrenta hela COVID-19, maibé nu’udár timor-oan la haluha populasaun sira ne’ebé foin daudaun hetan dezastre naturál no presiza ai-han,” Eis Prezidente Repúblika hateten hafoin simu doasaun, iha Lecidere, Dili, sesta ne’e.

Doasaun ai-han ne’e kompostu hosi foos kilograma 20 hamutuk saka 125, supermie kaixa 125 no mina kaixa 40.

Tuir Xanana, apoiu ne’e sei fahe tutan fali ba komunidade ne’ebé presiza duni ai-han iha situasaun kalamidade COVID-19 no dezastre naturál.

“Sira (ACCCTO) fó mai tanba hatene katak komunidade balun mai husu hahan iha ha’u, ne’ebé apoiu ne’e ita sei fó ba família sira ne’ebé presiza,” nia akresenta.

Eis Primeiru-Ministru, Kayrala Xanana Gusmão, simu doasaun hosi Asosiasaun Xineza Timor-oan iha NSW, Austrália, hodi distribui ba vítima dezastre naturál. Imajen TATOLI/Florêncio Miranda Ximenes

Xanana dehan, apoiu sei fahe direta ba ferik no katuas inklui timor-oan sira ne’ebé sofre moras, difisiénsia matan no fíziku iha sidade Dili no munisípiu sira.

Iha biban hanesan, Prezidente ACCTO, Kathleen Gonçalves, hateten apoiu doasaun ne’e tanba haree ba situasaun sosiál, liu-liu impaktu COVID-19 no dezastre naturál iha Timor-Leste.

Nune’e mós, Prezidente Asosiasaun Xineza Timor-oan, Tony Vong, hateten membru asosiasaun sira halo ona doasaun ai-han liuhosi líder nasionál, Espoza Prezidente Repúblika, Cidalia Nobre Lopes Mouzinho Guterres, Fundasaun Centro Quesadhip Ruak (CQR), no Madre sira iha Canossa Balide.

“ACCCTO simu pedidu hosi asosiasaun iha Sidney, Austrália hodi mai entrega ai-han balun ba Espoza Prezidente Repúblika no fundasaun Quesadhip Ruak, Madre sira iha Canossa Balide Dili no Avo Nana (Kay Rala Xanana Gusmão ) atu fahe ba komunidade kbiit laek sira,” nia akresenta.

Doasaun ne’ebé Asosiasaun Xineza apoia ba entidade sira ne’e mak hanesan foos hamutuk saka 425, supermie kaixa 425 no mina kaixa 170.

“Ami fó ona ba fatin haat, ba ita-nia na’in-ulun no fundasaun sira atubele fó tutan no tulun fali ba maluk kbiit laek sira,” nia hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here