Ekipa Saúde halo teste konfirmasaun temperatura ba traballadór timor-oan molok atu arranka bá Korea Súl, iha Aeroportu Comoro. Imajen TATOLI/Francisco Sony

DILI, 04 juñu 2021 (TATOLI)—Traballadór timor-oan hamutuk 65 arranka bá Korea Súl ho aviaun Air Asia, ne’ebé sai hosi Aeroportu Internasionál Prezidente Nicolau Lobato, Comoro, Dili, iha sesta ne’e, tuku 13:55.

“Ita prepara ita-nia traballadór atu bá hamutuk 80, maibé na’in-10 prepara fali bá jullu tanba kadeira iha aviaun la to’o tanba tenke iha distánsia entre ema ida ho ida, no ohin tuir planu sira atu arranka na’in-70, maibé na’in-lima la konsege halo viajen tanba rezultadu teste hatudu pozitivu COVID-19, tanba ne’e ohin na’in-65 mak arranka,” Diretór Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, informa, iha Aeroportu Comoro.

Notísia relevante: SEFOPE despede traballadór 70 aranka aban bá Korea Súl

Tuir Diretór, traballadór sira ne’ebé la konsege viajen ohin loron, sei arranka iha tempu tuir mai.

“Ami sei iha aprosimasaun ho Governu Korea hodi ko’alia ho empregadór, nune’e bele lori fali sira ne’ebé la konsege arranka ohin.

Enkuantu, traballadór seluk ne’ebé pozitivu, SEFOPE kontaktu ona parte saúde hodi lori sira kumpre kuarentena loron 14.

Traballadór regulár ne’ebé halo ona teste no foin dahuluk atu arranka á serbisu iha Korea Súl, iha kontratu hamutuk 420 no hein atu aranka de’it.

Hahú tinan 2009 to’o 2020, traballadór timor-oan hamutuk 3.696 mak serbisu ona iha Korea Súl iha área peska, fábrika no agrikultura.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here