Polísia Tránzitu Munisípiu Dili, kontinua halo sensibilizasaun ba kona-bá regra serka sanitária ba komunidade iha área Colmera, Matodoru, Caicoli, Audian no Culuhun, (31/05/21). Imajen/PNTL.

DILI, 04 juñu 2021 (TATOLI)—Polísia Nasionál Timor Leste (PNTL), liuhosi Komandu munisípiu Dili, detein motorista mane ida ho inisiál NM, ne’ebé tenta fó subornu ba ajente Polísia Tránzitu, Felis Maia de Deus, bainhira hala’o hela serbisu iha área kruzamentu Sang Surya Colmera, kuarta (03/06/21) tuku 16:00 otl.

Komandante Polísia Tránzitu Munisípiu Díli, Inspetór Polísia, Domingos Sarmento Gama, esplika PNTL detein motorista NM tanba kondús motór ho diresaun Bairru-Pité ultrapasa lampu merah iha parte Vila-Verde nian.

Notísia relevante:Polísia Tránzitu halibur osan hosi infratór sira $4.220

“Nune’e, polísia hapara hodi husu dokumentu, maibé la kompletu no NM koko fó fali subornu ba Polísia,” Inspetór Polísia, Domingos Sarmento Gama, hateten ba jornalista-sira iha Komandu Jerál Caicoli, sesta ne’e.

Domingos Sarmento Gama konta-tuir katak, tuir loloos NM ne’ebé mai-hosi Bairru-Pité ba área Vila-Verde, tuir loloos tenke para tanba lampu matak fó ona sinál, hodi troka ba lampu mean, tanba ne’e  Ajente Felis Maia de Deus halo auto-stop hodi entrega billete infrasaun no haruka ba selu iha BNCTL.

“Maibé, motorista ne’e foti $20 no obriga ajente ne’e atu simu nune’e problema ne’e bele rezolvidu,” Domingos Gama, subliña.

Bainhira ajente Polísia halo indentifikasaun, motorista ne’e iha de’it karta kondusaun, maibé dokumentu seluk laiha liuliu viola sinál tránzitu ne’ebé tenke selu multa tuir Lei.

Hafoin halo detensaun, PNTL mós halo kedan apreensaun ba motorizada, hodi halo investigasaun durante oras 72, no aprezenta kazu ne’e ba Ministériu Públiku (MP).

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here