Labarik fa'an manu tolun da’an iha Dili laran hodi asisite juventude sira hatais roupa tradisionál halo marxa. Imajen/António Gonçalves

DILI, 04 juñu 2021 (TATOLI)—Diretór Nasionál Reinsersaun Komunitária Sosiál no Inkluzaun, Florêncio Gonzaga, hateten to’o agora Ministériu Solidariedade Sosiál no Inkluzaun (MSSI) liuhosi dirasaun ne’e seidauk identifika no simu dadus kona-ba “labarik dalan ninin” iha territóriu nasionál.

Notísia Relevante: MEJD hakarak labarik sira faan manu-tolun, tama Ensinu Rekorrente

“Kona-ba labarik sira iha dalan ninin ba territóriu nasionál ita-nia tékniku la identifika maibé ba Munisípiu Dili identifika labarik dalan ninin ne’ebé sai vítima, hanesan involve iha grupu balun hodi fase karreta no faan sasán maibé MSSI seidauk iha dadus serteza,” Florêncio Gonzaga hateten ba Agência TATOLI, liuhusi telefónika, sesta ne’e.

Iha 2020 mak ekipa tékniku hosi Dirasaun Reinsersaun Komunitária Sosiál no Inkluzaun hala’o observasaun iha Dili laran ne’e, labarik grupu balun ne’ebé organiza aan fase karreta ka faan sasán iha dalan ninin maibé parte MSSI halo aproximasaun ho família no to’o ohin loron menus ona.

“Depois ita halo intervensaun ho parseiru sira no Polísia Nasionál Timor-Leste (PNTL) halo avizu ba sira no ita haree komesa diminui ona. Maibé, karik sei akontese hanesan insidentál. Iha fatin balun hanesan loron boot ruma sira faan bandeira no tempu natal no tinan foun sira faan atributu festa natal nian,” nia dehan.

Maibé, nia dehan, Governu liuhosi MSSI sei nafatin esforsu atu oinsá identifika labarik sira iha dalan ninin sira-ne’e, tanba MSSI sei buka dalan no esforsu halo aproximasaun ba família tanba labarik sira iha dalan ninin ne’e mesak hosi família ne’ebé kbiit laek.

“Iha parte balun, ami fasilita dadus liuhosi ministériu no parseiru sira atu fó apoiu ba ba labarik sira-ne’e,” nia dehan.

Antes ne’e Komisária Komisaun Direitu Labarik (CDC, sigla portugés), Dinorah Granadeiro, hateten CDC halibur ona dadus labarik kuaze 300 submete ba MSSI atu hetan bolsa da mãe, maibé sira-nia parte sei sei prosesu no halo kompilasaun ba dadus ne’e sei oferese ba MSSI atu haree mekanizmu hodi fó apoiu.

Dadus ne’e, CDC sei submete ba MSSI hafoin mak MSSI ho nia ekipa inklui xefe suku ho xefe aldeia sira hodi servisu hamutuk halo asesmentu para hatene labarik sira-ne’e merese duni atu hetan apoiu ka lae.

Aleinde ne’e, antes ne’e Komisária Komisaun Nasionál Direitu Labarik mós informa to’o iha marsu 2020 ne’e dadus atuál ba labarik sira ne’ebé mak hala’o atividade negósiu iha Dili laran kuaze na’in-300.

Nia hatutan, hosi labarik hirak ne’e la’os de’it halo atividade faan maibe sira-ne’e kuaze eskola mak hala’o negosiu hodi faan sasán. Hosi labarik kuaze 300 ne’e, labarik sira hosi Rejiaun Administrativa Espesiál Oé-Cusse Ambeno (RAEOA) 40% mak hala’o atividade faan sasán iha Dili.  

“KNDL rejistu labarik sira ne’ebé mak hala’o atividade faan sasán iha Dili laran ne’e kuaze na’in-300. Labarik sira ne’e la’ós faan de’it maibé labarik sira ne’e kuaze eskola oan depois mak hala’o servisu hanesan negósiu. Hosi labarik 300 ne’e, labarik mane mak barak liu no maiória hosi Rejiaun Administrativa Espesiál Oé-cusse Ambeno (RAEOA) nian. Labarik sira hosi RAEOA 40% mak hala’o atividade faan sasán iha Dili,” nia dehan.

Nia hateten, tanba Timor-Leste ratifika konvensaun internasionál ba labarik sira ne’ebé mak iha obrigsaun hosi Estadu atu estabelese komisaun ida hodi tau-matan ba lala’ok implementasaun hosi konvensaun direitu labarik nian.

Iha tinan 2009, Timor-Leste estabelese Komisaun Nasional Direitu Labarik ne’e hodi tutela iha Ministériu Justisa. Maibé, depois iha andamentu no iha mudansa ba Governu, mai to’o iha VIII ne’e tutela fali ona iha Ministériu Solidaridade Sosiál no Inkluzaun (MSSI) nian.

Notísia Relevante: KNDL sei submete dadus labarik 300 ba MSSI atu hetan “Bolsa da Mãe”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here