Traballadór sira hatun foos iha Portu Dili. Imajen Tatoli/António Gonçalves

DILI, 04 juñu 2021 (TATOLI)—Ministériu Solidariedade Sosiál no Inkluzaun (MSSI) liuhosi Dirasaun Promosaun Direitu ba Ema ho Defisiénsia, fó ona apoiu foos saka 938 no nesesidade bázika seluk tan ba Ema ho Defisiénsia (EhD) sira liuhosi Asosiasaun Defisiénsia Timor-Leste (ADTL).

Notísia Relevante: MSSI fó apoiu foos saka 35.748 ba ema kbiit laek sira

“Iha pandemia COVID-19 ne’e, ita haruka ona foos saka 938, mina, sabaun no seluk tan ba ita-nia maluk defisiénsia sira iha Dili maibé liuhosi ADTL, depois mak ADTL distribui ba ema ho defisiénsia sira,” Diretór Nasionál Promosaun Direitu ba Ema ho Defisiénsia, Mateus da Silva, informa ba Ajénsia TATOLI, liuhusi telefónika, sesta ne’e.

Ema ho defisiénsia sira-ne’ebé tama iha lista kbiit laek ne’ebé simu apoiu ne’e, nia informa, hosi Munisípiu Aileu ema hamutuk na’in-17, Ainaro iha na’in-sia (9), Baucau na’in-neen (6), Bobonaro na’in-neen (6), Covalima na’in-24, Dili na’in-501, Ermera na’in-36, Lautém na’in-40, Liquiça iha 12, Manatuto na’in-154, Manufahi na’in-71, RAEOA na’in- 34 no Munisípiu Viqueque hamutuk na’in-28.

Apoiu ida-ne’e, MSSI distribui ba Ema ho Defisiénsia (EhD) sira-ne’ebé laiha kbiit iha pandemia COVID-19 iha territóriu nasionál.

Notísia Relevante: MSSI haree injustisa no lakohi tau Ema ho Defisiénsia iha kotuk

Aleinde ne’e Diretór Nasionál Promosaun Direitu ba Ema ho Defisiénsia ne’e informa, ema ho desfisiénsia sira-ne’ebé simu nafatin osan liuhosi programa “bolsa da mãe” ne’e hamutuk ema na’in-582 ne’ebé kada fulan tolu-tolu ne’e simu osan.

Hosi númeru hirak ne’ebé simu ona bolsa da mãe ne’e, Governu liuhosi MSSI rekolla iha 2020 nian no kada labarik defisiénsia ida-idak simu $60 kada tinan ida, tanba kada fulan ida ne’e, kada ema ida hetan $5.  

Maibé, nia dehan, bainhira família uma-laran mak ho kondisaun defisiénsia mak liu ema na’in-haat ka lima, MSSI sei selu de’it ba ema na’in-tolu (3) de’it tanba tuir regra bolsa da mãe nian define ema na’in-tolu (3) de’it tanba kestaun ema barak mak presiza mós tulun hosi Governu.

Notísia Relevante: Governu fó ”Bolsa da Mãe” ba Ema ho Defisiénsia hamutuk 582

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here