Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 04 maiu 2021 (TATOLI)—Prezidente Komisaun A, Deputadu Joaquim dos Santos ‘Boraluli’, hateten kualkér proposta-alterasaun hosi parte ezekutivu sempre ho intensaun polítika maibé tenke ho intensaun di’ak ba Estadu.

“Kualkér proposta alterasaun ba Lei hotu ne’ebé tama mai ne’e ho intensaun polítika. Se la’ós ho intensaun polítika altera ba halo saida. Agora intensaun di’ak ka intensaun aat, se intensaun aat ami la simu ida. Komisaun A nia filozofia mak ida-ne’e,” Prezidente Komisaun A informa ba jornalista sira, iha resintu Parlamentu Nasionál, sesta ne’e.

Prezidente Komisaun A ne’e esplika, kestaun ne’e relasiona ho proposta-alterasaun datoluk ba lei númeru 5/2006, 28 dezembru kona-ba órgaun administrasaun eleitorál, alterasaun dahuluk ba lei númeru 6/2016, 25 maiu kona-ba lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

Nia dehan, proposta-lei ne’ebé fó prejuizu ba Estadu entaun Parlamentu Nasionál labele aprova, maibé ho intensaun polítika ne’ebé hadi’a povu nia moris hakarak ka lakohi tenke aprova.

“Se ema mak dehan halo lei ne’e la bazea ba intensaun ka pensamentu polítiku ne’e, entaun lei hosi ne’ebé mak ne’e. Tanba kompromisu eleitorál ne’ebé partidu polítiku sira halo depois nia tradús nia kompromisu eleitorál ne’e ba regulamentu ka dekretu ka proposta-lei ruma, ne’e intensaun polítiku mak ne’e,” nia dehan. 

Prezidente Komisaun A ne’e hateten, ajenda ona proposta-alterasaun ba lei tolu ba semana oin hahú hosi audiénsia ho instituisaun kompetente.

Prezidente Komisaun A halo esplikasaun ba kestaun ne’e hosi responde deklarasaun Eis Vise-Ministru Administrasaun Estatal, Tomás do Rosário Cabral, ne’ebé husu labele tau interese polítiku iha prosesu lejizlasaun ne’e, tanba votasaun ne’e diversifikada la’ós obrigatoriu no resensiamentu eleitorál mak obrigatóriu.

“Se ita impede hamate demokrasia. Ha’u haree no akompaña  hela depois Konsellu Ministru aprova, sira hakarak loke sentru votasaun paralelu ida iha Dili, intensaun saida. Sentru paralelu nia atu koadjuva ho sé, nia atu tama ba munisípiu ida-ne’ebé, nia atu tama ba suku ida-ne’ebé, nia atu tama ba postu administrativu ida-ne’ebé,” Eis Diretór Jerál STAE ne’e preokupa.

Nia afirma, se ida-ne’e mak akontese duni hodi halo mudansa ba lei tenke asume responsabilidade, sidadaun iha direitu atu husu ba Supremu Tribunál ba Justisa fiskalizasaun estra-konstitusionál ba alterasaun sira-ne’e.

Nia fó-sai katak, loloos prosesu eleitorál sira-ne’e di’ak hela, tanba iha kartaun eleitorál ne’e hakerek unidade jeográfia, maibé sentru paralelu ne’e ninia unidade jeográfia iha-ne’ebé.

“Ida-ne’e teória ha’u foin rona, teória ne’e  iha órgaun eleitorál laiha, ne’e teória foun ho karáter polítiku, proposta alterasaun CNRT sei diskute. Kuandu la tama ona mandatu konstitusionál ami haruka ba supreme tribunál justisa fiskalizasaun estra-konstituisionalidade, tanba ida ne’e interese polítiku,” nia argumenta.

Notísia Relevante: Tomás Cabral-Valentim Ximenes fó paréser ba Komisaun A

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here