Deputadu Joaquim Dos Santos, Imajen Tatoli/Antonio Goncalves

DILI, 04 maiu 2021 (TATOLI)—Komisaun A ne’ebé trata asuntu Justisa no Konstitusionál sei suspende proposta-alterasaun ba lei estatutu remuneratóriu ba titulár kargu polítiku tanba sei hein Governu aprezenta regra aplikasaun.

Prezidente Komisaun A, Deputadu Joaquim dos Santos, esplika proposta alterasaun ne’e baibain ema bolu ” Lei Pensaun Vitalísia” maibé termu loloos ne’e mak “Estatutu Remuneratóriu ba Titulár Kargu Polítiku” sira.

“Proposta-alterasaun ne’e mai diskute tiha ona no iha hela ajenda maibé Governu tenke aprezenta fali regra aplikasaun katak lei ne’e tama ein-vigór labele prejudika benefisiáriu sira-nia direitu. Governu tenke prepara kondisaun ba ida-ne’e. Ita bele aprova proposta-alterasaun maibé Governu laiha kapasidade karik entaun ami (lejizladór) mak sala. La kusta buat ida, ita aprova maibé Governu tenke prepara kondisaun. Agora Komisaun A pendente hela proposta-alterasaun ba lei lei pensaun vitalísia ne’e,” Prezidente Komisaun A ne’e informa ba jornalista sira, iha resintu Parlamentu Nasionál, sesta ne’e.

Prezidente Komisuan A ne’e husu ona ba Governu aprezenta regra sira kona-ba aplikasaun kuandu entrada ein-vigór maibé to’o agora Governu seidauk haruka ba uma fukun.

“Ne’ebé, ami hein hela sira-nia resposta ne’e. Ami diskute tiha ona maibé ami seidauk halo relatóriu no paresér tanba hein hela resposta Governu nian,” nia dehan.

Kualkér proposta-alterasaun labele fó prejuizu ba lei ne’ebé vigora tiha ona direitu ema-nian, atu funsaun públiku ka atu kargu polítiku tanba dever ne’e regula iha lei, titulár sira regula ho lei ketak.

“Kuandu ita halo lei ida fó fali prejuizu ba direitu sidadaun ninian entaun lei ne’e serve tanba ne’e mak sei tetu didi’ak. Tanba atu halo transferénsia ne’e la’ós fásil. Ita aprova lei ida hodi halo transferénsia ba ema-nia direitu ba sistema foun la prejudika ema-nia direitu ne’e di’ak. Se prejudika ema-nia direitu, entaun lei ne’e la serve,” nia akresenta.

Nia esplika, titulár sira-ne’e la’ós funsionáriu públiku, sira iha rejistu ba esperiénsia ne’e tanba titulár sira mai dala-ida no ba dala-ida.

“Sorte di’ak mai fali, sorte ladi’ak la mai ona. Oinsá atu integra ida-ne’e ba seguransa sosiál. Ami iha problema boot ba ida-ne’e. Se fó tenke iha regra aplikasaun tanba nia hetan konfiansa hosi povu. Nia mai hosi dosente ka nia mai hosi agrikultór maibé Konstituisaun mak hakarak atribui direitu ne’e entaun nia merese. Se lei la fó entaun ita labele obriga,” nia hateten.

Maibé Konstituisaun no lei mak atribui direitu ida-ne’e entaun regra ba aplikasaun tenke haree didi’ak, nune’e labele prejudika fali Konstituisaun no lei fó atribuisaun ne’e.

“Matéria ida-ne’e ami seidauk hetan klarifikasaun hosi Governu. Kuandu Governu haruka mai entaun ami aprova ona. Ha’u pending hela tanba ha’u haree matéria fundamental ida tenke diskute didi’ak. Se seidauk fó dala-ida ne’e fásil tanba ita tinan 20 tiha ona ne’e,” nia dehan.

Deputadu Bankada FRETILIN ne’e subliña, durante tinan 20 aplika ona lei no lei ne’e la’o ba oin entaun sira-ne’ebé simu ne’e labele hapara.

“Agora sira mai tuir ne’e halo nusá. Se la fó, di’ak-liu la fó hotu. Se fó tenke iha regra ida labele prejuizu fali ezersísiu direitu ne’e. Ita halo alterasaun ba lei ida la fásil ida. La’ós hanesan públiku hakilar dehan “a baixo pensaun vitalísia”. Ha’u mai serbisu la husu pensaun vitalísia ida, Estadu hakarak fó ha’u simu maibé tenke liuhosi lejizladór sira,” Prezidente Komisaun A ne’e hateten.

Remuneratóriu ba titulár kargu politiku sira bazea ba regulamentu UNTAET númeru 2001/13, 6 dezembru.

Jornalista: Evaristo Soares Martins

Editór: Cancio Ximenes

2 KOMENTÁRIU

  1. Sr joaquim dos santos hau militante fretilin desde que hau nia tinan cdauk to militante kedas ona no to agra hau militante fretilin nafatin por favor ho fuan bot Altera tia lei neba ne laos politika ida nia exigencia maibe ne povu mk exige por favor hanoin ba nasaun ne aban bainrua
    Povu fo contrato ba imi wainhira imi halo knar imi iha direito tomak maibe quando tun ona mk han tiba simu osan ne hau hanoin la justo por favor halo politika ho fuan bot ba povu ida ne
    Hau hanoin integra iha seguranca social mais justo liu sr. Deputado Lalika dada ba dada mai hodi falun imi nia interese privado
    Mario Tilman dos Reis
    Ciencia sociais e politika UNDIL

  2. Sua. Exe. Sr. Deputado presiza halo alterasaun ba lei pensain vitalisia Ita boot sira partido fo kontratu tinan Lima Maibe povu Nia ejenjia tenki halo tuir Laos lori Ita boot Sira Nia intrese pesoal Jodi depent fali povu Nia direito, ema neb atu simu Nia tenki atibu iha servisu Laos hanesan ona povu baibain Ita kontinua fali simu ne’e Hau hanoin Ita ohoo povu Moris deit.

Leave a Reply to Mario Tilman Cancel reply

Please enter your comment!
Please enter your name here