Prezidente ACCCTO, Kathleen Gonçalves, reprezenta Asosiasaun Xineza Timor-oan Sydney, Tony Vong, entrega apoiu aihan ba GAAC-PR liuhosi Espoza Prezidente Repúblika, Cidália Nobre Lopes Mouzinho Guterres, iha Palásiu Prezidensiál, sesta (04/05). Imajen/Mídia PR.

DILI, 04 juñu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, sesta ne’e hato’o agradesimentu ba Associação Comercial da Comunidade Chinesa Timorense (ACCCTO) ne’ebé entrega doasaun ai-han hosi komunidade xineza timor-oan ne’ebé hela iha Sydney, Austrália, ba Gabinete de Apoio á Actividade do Cônjuge do Presidente da Republica (GAAC-PR) iha Palásiu Prezidensiál Nicolau Lobato, Bairru Pite, Dili.

Notísia Relevante: Espoza PR fó apoiu umanitáriu ba família F-FDTL uma kain 98

Doasaun ida-ne’e hanesan doasaun faze daruak nian ne’ebé komunidade xineza timor-oan sira-ne’ebé halibur iha Asosiasaun Xineza Timor-oan Sydney fó liuhosi GAAC-PR, hodi hala’o asaun solidaridade atu apoiu timor-oan sira-ne’ebé foin lalais sofre inundasaun no ba hirak ne’ebé oras ne’e hasoru difikuldade tanba situasaun pandemia COVID-19.

“Hodi Gabinete Espoza nia naran, ha’u hato’o ami-nia agradese wa’in tebe-tebes ba Asosiasaun Xineza Timor-oan iha ne’e no mós iha rai-li’ur. Onra tebes mai ha’u no mós ba GAAC-PR hafoin simu tan informasaun katak sei iha tan doasaun hosi ita-nia maluk sira iha Sydney Australia. Prezidente ho estrutura sira iha ne’ebá, hakarak fó apoiu ba dala rua mai iha gabinete ha’u-nian, atu ita hamutuk hala’o asaun solidaridade ba ita-nia komunidade sira-ne’ebé mak afetadu. Ita hasoru situasaun rua ne’ebé difísil tebes, ida mak pandemia no kalamidade,” Espoza Prezidente Repúblika, Cidália Nobre Guterres, hateten liuhosi komunikadu imprensa ne’ebé Agência Tatoli asesu, sesta ne’e.

Prezidente ACCCTO, Kathleen Gonçalves, reprezenta Asosiasaun Xineza Timor-oan Sydney, Tony Vong, entrega apoiu aihan ba GAAC-PR liuhosi Espoza Prezidente Repúblika, Cidália Nobre Lopes Mouzinho Guterres, iha Palásiu Prezidensiál, sesta (04/05). Imajen/Mídia PR.

Iha apoiu barak hosi maluk timor-oan sira ne’e, labele sura ida-ba-ida ne’ebé mak hala’o ona apoiu ba komunidade afetadu sira hotu, liuhosi apoiu aihan no nesesidade bázika seluk ne’e  konta mós ho apoiu hosi Asosiasaun Xineza Timor-oan iha Sydney-Australia.

Espoza Prezidente Repúblika ne’e relata, apoiu dahuluk ne’ebé GAAC-PR simu hosi asosiasaun ne’e distribui ona hodi fó tulun ba komunidade afetadu hosi inundasaun iha Hera, Masilidun, Lahane, ba estudante sira, ba Parokia Balide no komunidade sira-ne’ebé prezisa tebes apoiu.

Apoiu hirak ne’ebé GAAC-PR distribui, la’o tuir verifikasaun ida-ne’ebé hala’o ho rigór, nune’e apoiu sira-ne’e bele to’o duni ba ema hirak ne’ebé presiza.

Kona-ba apoiu darauk ne’e, GAAC-PR aleinde sei kontinua fó ba komunidade afetadu inundasaun no estundante sira iha Díli, sei distribui mós ba komunidade afetadu inundasaun no sira-ne’ebé presiza tulun hanesan iha munisípiu sira.

Iha biban ne’e, Espoza Prezidente Repúblika mós hato’o apresiasaun ba estrutura ACCCTO no Asosiasaun Xineza Timor-oan iha Sydney-Australia.

“Prezidente Repúblika mós hato’o nia kumprimentu, hakuak boot, fó saudasaun ba Prezidente ACCCTO Kathleen no estrutura tomak, no mós hato’o saudasaun ba Prezidente Tonny Vong iha rai-li’ur, ne’ebé hanoin nafatin hodi fó apoiu mai GAAC-PR hodi hala’o asaun solidariedade ida-ne’e,” nia dehan.

Entretantu Prezidente ACCCTO, Kathleen Gonçalves, informa apoiu ida-ne’e atu tulun GAAC-PR kontinua hala’o nia asaun solidaridade no hato’o mós kumprimentu no saudasaun hosi Prezidente Asosiasaun Xineza Timor-oan Sydney, Tony Vong ho nia estrutura ba Espoza Prezidente Repúblika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here