Arsebispu Metropolitana Arkidioseze Dili, Mgr. Virgílio do Carmo da Silva, SDB. Imajen Tatoli/Francisco Sony

DILI, 04 juñu 2021 (TATOLI)-Arsebispu Arkidioseze Metropolitana Dili, Dom Virgílio do Carmo da Silva, SDB, hateten, situasaun COVID-19 iha Timor-Leste daudaun ne’e iha ona transmisaun komunitária no dalan úniku atu liberta povu livre hosi peste letál ne’e mak hotu-hotu kolabora simu vasina AstraZeneca.

Notísia Relevante : COVID-19: pozitivu 112, rekoperadu 134 no ativu 2.580

Dom Virgílio hateten, pandemia COVID-19 ne’e la’ós iha Timor-Leste de’it, maibé virus ida ne’e iha mundu tomak, hanesan hotu-hotu hatene katak iha mundu virus ne’e habadak ema-nia vida barak loos, ikus haree iha  India ne’ebé lakohi kolabora kontra regra hosi Organizasaun Mundiál Saúde (OMS) ikus mai moras refere  satan labele.

“Timor-Leste grasa Maromak nian, maske númeru ne’e aumenta maibé la todan hanesan iha nasaun sira seluk. Ne’e duni moras ne’e perigu, hanoin ita ida-ida mak tenke hatene no oinsá kolabora Estadu no Governu simu vasina,” Dom Virgílio haktuir ba jornalista-sira Igreja Katedrál Dili, kinta (23/06).

Nia hatutan, ko’alia kona-ba pro no kontra ba vasina AstraZeneca ne’e la’ós iha Timor-Leste de’it maibé hotu-hotu akompaña iha mídia sosiál haree iha Europa, Amérika no nasaun barak loos mak kontra, maibé ikus mai simu filafali vasina ne’e.

 “Liberdade ba ema hotu-hotu atu iha pro no kontra, maibé hanoin impotente mak labele hanoin ita-nia di’ak de’it, maibé hanoin mós ba Timo-Lester nia di’ak, tanba ne’e buka tulun-malu nune’e situasaun ne’e bele normaliza lalais,” Dom Virgílio apela.

 Arsebispu dehan, bainhira komunidade la kolabora Governu kontinua dudu malu hanesan ne’e no la simu vasina AstraZeneca mak fula-fulan hakarak ka lakohi rona katak kontinua Estadu Emerjénsia, serka sanitária no konfinamentu obrigatóriu.

“Ita hakilar dehan hamlaha hakarak livre buka moris atu labele hamlaha, hakarak eskola, entaun atu solusiona problema sira-ne’e nia dalan mak ida de’it simu vasina,” Dom Virgílio do Carmo da Silva, SBB hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here