Prezidente TLV, Abel da Costa Conceição no reprezentante komunidade, Venaçio Ximenes, entrega nesesidade báziku ba komunidade Aldeia 12 Outubru, Suku Comoro, Postu Administrativu Don Aleixo, Munisípiu Dili, kinta (03/06). Imajen Tatoli/Francisco Sony

DILI, 03 juñu 2021 (TATOLI)-Grupu Voluntarizmu Timor-Leste Vision (TLV), kinta ne’e, fahe apoiu nesesidade báziku ba vítima dezastre naturál uma-kain 87 iha Aldeia 12 de Outubru, Suku Comoro, Postu Administrativu Don Aleixo, Munisípiu Dili.

Prezidente TLV, Abel da Costa Conceição hateten, TLV fó apoiu nesesidade báziku ba komunidade uma-kain 87 ne’e la’ós atu troka Governu nian fatin fahe sasán ba komunidade, maibé sira fó apoiu uitoan tuir kbiit ne’ebé iha.

“Ami hosi TLV distribui sasán hanesan nesesidade báziku ba komunidade uma-kain 87 tanba sira hatama pedidu dehan presiza ai-han,” Abel da Costa Conceição, haktuir ba jornalista-sira hafoin distribui sasán nesesidade báziku ba komunidade-sira iha Aldeia 12 de Outubru, Tasi-Tolu, Dili, kinta ne’e.

Nia dehan, sasán nesesidade báziku ne’ebé sira fahe ba vítima dezastre naturál ne’e mak hanesan, kada uma-kain hetan foos saka ida, mina litru rua masa ida, sabaun no seluk tan.

“Osan ne’ebé ami hetan ne’e apoiu hosi ami-nia maluk doadór TLV iha Austrália, Estadu Unidu Amérika, nune’e ba situasaun COVID-19 no kalamidade ne’e osan ami hetan apoiu ba vítima dezastre naturál sira ne’e hahú hosi loron 05 abríl to’o agora, ami gasta ona osan hamutuk $26.000,” nia esplika.

Osan sira-ne’e sosa sasán ba vítima dezastre naturál-sira, inklui mós maluk sira ne’ebé hamlaha iha situasaun serka sanitária no konfinamentu obrigatóriu, maibé osan $ 26.000 ida ne’e seidauk konta ba projetu sira seluk.

Iha fatin hanesan, Venancio Ximenes reprezentante komunidade Aldeia 12 de Outubru, Comoro, Dili hateten, pedidu ne’ebé nia parte hatama ba TLV tanba hafoin akontese inundasaun iha loron 04 abríl liubá, aumenta situasaun serka sanitária no konfinamentu obrigatóriu hosi Governu liuhosi Sekretáriu Estadu Protesaun Sivíl (SEPS) ba foti ona sira-nia dadus maibé sira tama hotu ba reklamasaun entaun to’o agora sira seidauk hetan apoiu hosi Governu.

Vítima dezastre naturál, Lucinda Tilman hateten, sira  kontente tebes tanba iha situasaun difisil ida ne’e TLV iha fuan boot bele tulun sira.

“Sentimentu ne’ebé mak ami iha kontente tebes bainhira hetan apoiu tanba ho situasaun dezastre naturál ne’ebé afeta ami iha fulan rua liubá, mai tama tan Estadu Emerjénsia, serka sanitária no aumenta tan konfinamentu obrigatóriu ida-ne’e afeta tebes ami-moris loro-loron nian,” nia tenik.

Tuir oráriu hosi TLV hafoin fó apoiu nesesidade báziku ba komunidade uma-kain 87 iha Aldeia 12 de Outubru, Suku Comoro, kontinua kedas fahe apoiu nesesidade báziku ba estudante hamutuk 76 hosi Rejiaun Administrativa Espesiál Oé-Cusse Ambeno (RAEOA) ne’ebé hela iha terminál Tasi-Tolu.

Sasán nesesidade báziku ne’ebé sei fó ba estudante-sira  hosi RAEOA hela terminál Tasi-Tolu mak hanesan, foos hamutuk saka 38, ida ne’e kada ema na’in rua fahe foos saka ida aumenta mina, sabaun no seluk tan.

Hafoin ida ne’e kontinua fó apoiu foos hamutuk saka 50 ba Madre Kongregasaun Fillas ba Karidade Kanosiana (FDCC), Balide, Dili.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here