Jestora Programa ADTL, Veronica Tilman, bainhira hala'o hela tratamentu saúde ba nia ain ne’ebé duurante moris mai ne’e deifisienta ona. Imajen/Espesiál.

DILI, 03 juñu 2021 (TATOLI)—Haree ho matan molik nia defsiente fíziku ida la hanesan ita ne’ebé moris mai ho kondisaun relativu perfeitu, maibé se ita leno-aan hosi nia moris ne’e bele akontese ita moe ba ita-nia aan rasik. Nia bele defisiente fíziku maibé ninia mental la defisiente.

Maske hanesan feto defisiente ida maibé nia hanesan feto potensiál ida-ne’ebé la depende ba ema seluk no luta ba ninia moris rasik atu sai hosi nakukun laran. Nia la egoista maibé nia mós luta hodi hala’o knaar nu’udar servisu-na’in ida atu liberta “ema ho defisiénsia” sira atu hetan sira-nia direitu moris no labele hetan tan diskriminasaun iha ámbitu ukun rasik aan ne’e.

“Lebele dependente liu ba ema seluk tanba ó-nia lalatak rasik mós bele la’o husik hela ó bainhira ó iha nakukun laran. Ita tenke brani hakuak ita-nia lalatak rasik iha nakukun laran hodi luta ba ema seluk nia moris,” Veronica Tilman ne’ebé moris iha Aileu iha 19 abríl 1993 ne’e, hateten ba Agência TATOLI, iha nia knaar fatin, Assosiação de Deficientes de Timor-Leste (ADTL), Quintal Boot, foin lalais ne’e. 

Jestora Programa ADTL, Veronica Tilman. Imajen/Espesiál.

Tuir Veronica, ema ho defisiénsia ne’e problema persepsaun de’it maibé bainhira bele halo buat ida ho di’ak mak ema ida sei presiza iha loron ikus. Nia fiar aan, tanba ho matenek ne’ebé nia iha, oras ne’e nia kaer-toman nia lalatak rasik iha nakukun laran, hodi kaer kargu importante nu’udar Jestora Programa (Manajer Program) iha Assosiação de Deficientes de Timor-Leste (ADTL).

“Labele subar ita-nia aan iha fatin de’it, maibé ita tenke berani hatudu ita-nia aan ba públiku, hodi partisipa iha eventu sira liu-liu iha área edukasaun nian. Hatudu ba ema liuhusi ita-nia matenek, ezerse ita-nia kapasidade hodi kontribui ba ita-nia maluk defisiente sira seluk, liu-liu ba família sira, oinsá atu apoiu oan sira maske sira moris mai ho kondisaun fíziku defisiénsia,” nia fó hanoin. 

Fihir aan hosi ninia lalenok rasik ne’ebé lori nia sai susesu, nia fó korajen ba inan-aman sira liu-liu família sira-ne’ebé sira-nia oan moris mai ho kondisaun defisiente, atu apoiu oan sira la’o no hakat ba oin tanba família nu’udar hun no abut ne’ebé bele dudu oan sira ba oin no buras.

“Xave ba ema ho defisiénsia sira atu ba oin ne’e, mak primeiru apoiu hosi família sira. Tanba, família mak sai hanesan hun no abut hodi fó apoiu atu ema ho defisiénsia sira ba oin,” nia dehan ho esperansa be nakonu.

Nia otimista, maske nu’udar feto ida ho kondisaun defisiente, maske la fasil atu asessu ba iha área servisu sira, maibé agradese tanba organizasaun defisiente sira mós hamriik no fó oportunidade ba ema ho defisiénsia, liu-liu fó oportunidade mós ba feto sira-ne’ebé ho kondisaun defisiénsia atu partisipa iha área serbisu públiku.

“Ha’u serbisu tinan liman nu’udar ofisiál baze iha komunidade, ne’ebé serbisu besik liu ema ho defisiénsia sira. Buat ne’ebé enkoraja ha’u serbisu to’o ohin loron mak pasiénsia. Tanba, dala ruma hasoru ema ho defisiénsia sira ho karáter ne’ebé la hanesan. Balun simu ita. Balun la simu no balun tan lakohi simu ita-nia prezensa,” nia dehan.

Jestora Programa ADTL, Veronica Tilman. Imajen/Espesiál.

Hosi esperiénsia ne’ebé nia hetan iha servisu fatin, nia konsiente katak servisu iha área defisiénsia ne’e sensitivu tebes. Entaun, presiza ema ne’ebé mai ho esperiénsia rasik, atu oinsá bele fó motivasaun no muda ema ho defisiénsia sira seluk nia mentalidade atu involve iha atividade iha públiku.

“Liuhosi ida-ne’e, ha’u deskobre ona katak ha’u-nia maluk ema ho defisiénsia barak mak seidauk loke sira nia-aan, atu bele partisipa iha atividade sira iha públiku. Liu-liu maluk feto sira-ne’ebé ho kondisaun defisiénsia, sira-nia mentalidade fraku liu duké mane ho defisiénsia sira,” nia hateten.

Ema ho defisiénsia sira, nia dehan, baibain hasoru difikuldade prinsipál liu mak hasoru no hetan diskriminasaun hosi sosiedade no família rasik. Tanba ho diskriminasaun ne’ebé iha, halo ema ho defisiénsia sira fiar aan menus liután.

“Difikuldade seluk ne’ebé ha’u hasoru mak dala ruma sai ba serbisu, família sempre ko’alia barak. Satan ho kondisaun defisiente hanesan feto, dala ruma atu serbisu sempre rona ema ko’alia barak, halo ita-nia fiar aan ne’e menus no lakon. Maibé ho espíritu vontade ne’ebé ha’u iha, la hamate ha’u nia vontade atu aprende no aprende beibeik ho maluk ema ho defisiénsia sira iha knaar fatin,” nia dehan.

Nu’udar Jestora Programa iha Assosiação de Deficientes de Timor-Leste (ADTL), nia knaar loro-loron nian mak haree liu ba programa tolu (3) mak kona-ba Edukasaun Inkluzivu, ne’ebé haree ba edukasaun non formál no formál, oinsa haree liu ba ema ho defisiénsia sira atu asesu ba iha edukasaun públiku.

Programa daruak mak foka ba Empoderamentu Ekonomia ba ema ho defisiénsia sira, no programa ida-ne’e haree liu oinsá atu hakbiit ema ho defisiénsia sira iha ekónomia uma laran.

Programa ikus liu mak Advokasia no Inkluzaun Sosiál, programa ne’e haree liu ba direitu ema ho defisiénsia, oinsá atu halo advokasia ba nível nasionál hodi husu Governu Timor-Leste atu bele halo ratifikasaun ba konvensaun direitu ba ema ho defisiénsia sira-nian.

Biodata

Veronica Tilman moris iha Aileu iha 19 maiu 1993. Daudaun ne’e hela iha Manleuana. Nia kaben ho Francisco Xavier Lopes, ho kondisaun defisiénsia fíziku (ain amputasi). Agora iha oan na’in-rua (2), mesak mane no moris mai ho kondisaun normál. Oan mane boot hala’o estudu iha Pré-primaria Manleuana iha terseira klasse, no ida segundu hala’o estudu iha Pré-Eskolar Internasional School Filipina. 

Jestora Programa ADTL, Veronica Tilman. Imajen/Espesiál.

Nia hala’o nia estudu iha Ensinu Báziku Primeiru no Segundu Siklu hahú iha tinan 2005-2010, iha eskola Camea Becora. Ensinu Báziku Terseiru Siklu iha tinan 2010-2013, iha Eskola Sagrado Coração de Jesus Becora no kontinua estudu iha Ensinu Sekundária iha 2013-2015 eskola Sekundária Rainha da Paz. Agora, nia iha planu atu kontinua estudu iha nível universidade, iha Fakuldade Direitu, ho objetivu atu haree liu ba direitu feto no labarik ho defisiénsia sira.

Veronica Tilman moris mai ho kondisaun defisiénsia kedas. Hafoin halo tinan 14, nia foin hetan assisténsia médiku ne’ebé hetan apoiu hosi Austrália no Nova Zelandia, hodi apoia halo tratamentu saúde iha Nova Zelandia, hahú iha 15 marsu 2008.

Depois hetan tratamentu, nia bele la’o hanesan ema baibain, tanba antes ne’e nia ain rua ne’e silu-aan (fila) ba kotuk. Maske tratamentu la to’o 100% no bele dehan 50%, maibé nia bele la’o hanesan ema baibain.

Veronica Tilman, nia Inan-Aman fila hikas ba Aman Maromak nia Kadunan Santu. Nia inan-aman naran Elisabet Besi no Nicodemos Varela Tilman. Veronica Tilman iha maun-alin hamutuk na’in-haat (4) no hamutuk ho nia ne’e sira hamutuk na’in lima (5)—feto na’in-haat (4) no mane na’in-ida (1).

Esperiénsia Servisu

Iha 13 agostu 2012, nia serbisu iha Organizasaun Raes Hadomi Timor Oan (RHTO), hanesan Offisiál Baze iha Kampu iha munusípiu Aileu. Depois iha tinan 2018, nia sai hanesan Jestora Programa iha RHTO.

Iha loron 03 agostu 2019, nia kontinua serbisu iha Assosiação de Deficientes de Timor-Leste (ADTL), nu’udar Koordenadora Advokasia no Inkluzaun Sosiál.

Depois ida-ne’e, iha tinan 2021, kontinua hala’o kna’ar foun hanesan Jestora Programa iha Assosiação de Deficientes de Timor-Leste (ADTL) to’o ohin loron.

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here