Sarani-sira hakne’ak bainhira Santísimu Sakramentu liuhosi sira-nia oin. Kinta (03/06/2021). Imajen Tatoli/Francisco Sony

DILI, 03 juñu 2021 (TATOLI) – Sarani Katóliku iha mundu, inklui Timor-Leste, kinta ne’e, selebra solenidade Kristu Nia Futar Isin no Ran (Santísimo Corpo e Sangue de Cristo).

Ba sarani-sira Arkidioseze Metropolitana  Dili ne’ebé kumpre hela serka sanitária no konfinamentu obrigatóriu tanba pandemia COVID-19, solenidade ne’e halo liuhosi prosisaun lori Santísimu Sakramentu hosi Comoro ba to’o Tasi-Tolu no liu mai ba to’o Bee-Dois, Becora hodi termina iha Igreja Katedrál Dili  ho bensaun ba ema hotu hosi Arsebispu Arkidioseze Metropolitana, Mgr. Virgílio do Carmo da Silva, SDB.

Sarani-sira tau ai-funan no lilin ba Santísimu Sakramentu. Imajen Tatoli/Francisco Sony

Rute vizita Santísimu Sakramentu nian hahú hosi  Igreja  Parókia Maria Auxiliadora Comoro, fila direta liuhosi Bombeiru no ba rai-hun Golgota  nian hodi borus ba Sentru Kombustivel Mãe da Graça no liubá Izolamentu Tasi-Tolu.

Hosi Tasi-Tolu liu mai Rotunda Prezidente Nicolau dos Reis Lobato, hakukur ponte CPLP, Igreja Ai-Mutin, Ai-tarak Laran, Jardín 5 de Maiu, Palacio do Governo, liubá Rotunda Prezidente Francisco Xavier do Amaral, Audian, Kulu-Hun, Igreja Becora to’o Terminal Becora.

Fila hosi Becora tama liuhosi Eskola Sekundáriu Jerál Tékniku Vokasionál Becora, Semitériu Becusse, Taibessi, Semitériu Xineza, Kruzamentu Lahane, fila direta ba Kruzamentu Igreja Balide, Matadoru, Obrigadu Barak no fila direta ba termina iha Igreja Katedrál Dili.

Solenidade Kristu Nia Futar Isin no Ran iha igreja balun iha Vigararia Dili nian, balun selebra liuhosi misa-hamutuk iha dadeer no balun iha loraik. Maibé  Dioseze rasik forma ekipa ki’ik ida hodi lori Santísimu ka Jesus Nia Futar Isin halo prosesaun liuhosi estrada protokolu Comoro nian liubá Tasi-Tolu no liu fali ba Becora (Bee-dois) no termina iha Igreja Katedrál Dili.

Iha prosisaun Santísimu  Sakramentu ne’e, sarani barak hatudu jestu oioin bainhira Jesus Kristu Nia Futar Isin liu iha sira oin. Balun halo Sinál  Krús nian, balun hakne’ak no balun fali lori ai-funan kari ba Jesus Nia Futar Isin  ne’ebé tula iha karreta hodi hala’o prosisaun.

Arsebispu Arkidioseze Metropolitana Dili, Mgr. Virgílio do Carmo da Silva, SDB. Imajen Tatoli/Francisco Sony

Ba jornalista-sira hafoin akompaña prosisaun ne’e, Arsebispu Arkidioseze Metropolitana, Mgr. Virgílio do Carmo da Silva, SDB, esplika katak festa Kristu Futar Isin no Ran, nu’udar festa ida ne’ebé uma kreda tau iha kinta feira depois festa Santísima Trindade. Nune’e duni konvida sarani-sira atu adora Jesus Nia Futar Isin no Ran.

“Ita selebra iha situasaun pandemia COVID-19 nian, ita la halo serimónia hanesan baibain, maibé ita foti ekipa oan ida lori Jesus Nia Futar Isin hodi la’o iha Dili laran ho bensaun ba ema hotu,” hateten Dom Virgílio.

Jestu hosi selebrasaun ida-ne’e, tuir Dom Virgílio, nu’udar dalan ida atu fó hanoin fali ba sarani-sira katak loron ida feriadu ne’e la’ós loron feriadu ida baibain,  maibé loron feriadu ida ba Sarani-sira atu adora Kristu Nia Futar Isin no Ran.

“Prezensa Jesus Nia Isin ne’ebé la’o hale’u atu bolu fila fali sarani-sira hamanas fila-fali ita-nia domin ba iha Jesus Nia Futar Fuan Santu. Tan ne’e bainhira Jesus Nia Futar Isin liu, sarani-sira hatudu sira-nia domin boot halo Sinál Krús nian, balun hakne’ak, balun prepara ai-funan hodi lori no karik. Ida-idak iha ninia jestu ne’ebé ita haree mai espontánea. Ita haree reasaun oioin ne’ebé hatudu maske ho servisu oioin, maibé bainhira Jesus Futar Isin liu hotu-hotu halo Sinál Krús nian, hakne’ak no soe ai-funan. Ida-ne’e jestu ida kapás tebes liuliu iha momentu ida-ne’e ohin loron nian hodi hamanas dala ida tan ita-nia fuan,” Dom Virgílio tenik.

Dom Virgílio subliña tan katak ba sarani-sira, Kristu Nia Futar Isin no Ran maka ai-han espirituál nian hodi fó forsa ba ema ida-idak, liuliu iha tempu susar no terus oioin ne’e, Jesus Nia Futar Isin ho Ran maka sustenta ita-nia vida espirituál, vida morál no vida aban bainrua nian.

Liuhosi prosisaun Santísimu Sakramentu ne’ebé  hale’u sidade Dili,  Dom Virgílio, tenik sei hametin sarani-sira nia fiar no hamanas fila-fali sira-nia fuan no laran.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here