Livru ho imajen Patrimóniu Kulturál ne’ebé SEAK prodús. Imajen Tatoli/Nelia Fernandes.

DILI, 02 juñu 2021 (TATOLI)—Governu liuhosi Sekretáriu Estadu Arte no Kultura (SEAK) simu karta hosi Autoridade Expo Dubai nian atu fornese objetu kulturál ne’ebé Timor-Leste iha, nune’e bele eprezenta iha Expo Dubai iha tinan ida-ne’e.

Notísia Relevante: Governu sei haruka lista produtu definitiva ba KO Expo Dubai

Pontu Fokál Sekretáriu Estadu Arte no Kultura ba Expo Dubai, Fransisco Urbano dos Santos, hateten auotoridade Expo Dubai halo tiha ona rejistu ho partisipante sira iha Dubai entaun Timor-Leste laiha posibilidade atu lori objetu kulturál sira, maibé sei lori livru publikasaun kona-ba Patrimóniu Kulturál hamutuk 69 ne’ebe SEAK prodús. 

“Infelismente tanba hosi Autoridade Expo Dubai rasik halo tiha ona rejistu ida ho sira iha Dubai nian, entaun ita laiha posibilidade atu lori ita-nia objetu kulturál sira. Maibé, ita halo liuhosi livru 69 ne’ebé ita produs ne’e kona-ba patrimóniu kulturál ne’ebé aprezenta imajen kona-ba kolesaun estátua antigu sira-ne’ebé uluk ita-nia bei-ala sira prodús,” Fransisco Urbano dos Santos informa ba Agência Tatoli, iha edifísiu SEAK, Avenida Portugal, kuarta ne’e.

Hosi livru 69 ne’e, iha livru balun ne’ebé aprezenta kona-ba arte moris hosi povu Timor-Leste nian no livru seluk kona-ba Património Arquitetónico de Origem Portugues de Liquiça, kona ba uma lulik.

“Livru 69 ne’e sei aprezenta iha Expo Dubai, atu nune’e vizitante sira bele haree. Livru sira ne’ebé ita lori ba, ita sei lori fila-fali mai. Alende livru, SEAK mós fó brosura no pamfletu hamutuk 2500 kona-ba Kultura Timor nian, atu distribui ba vizitante sira,” nia dehan.

Broxura ne’ebé SEAK prodús. Imajen Tatoli/Nelia Fernandes.

Nia infoma, iha últimu informasaun ne’ebé SEAK simu hosi parte Autoridade Expo Dubai nian halo ona rejistu maibé karik iha posibilidade atu Timor-Leste transporta objetu kulturál sira-ne’e bainhira iha notifikasaun hosi Autoridade Expo Dubai rasik.

“Ita hein, se presiza duni objetu kulturá balun, ita sei haruka ba. Ne’e ita agradese tebes tanba ita-nia imajen no identidade kulturál bele haruka ba iha rai-li’ur,” nia dehan.

Produtu no sasán hirak ne’ebé haruka ba Dubai ne’e, tuir planu sei aprezenta iha abertura Expo Dubai iha loron 01 fulan-outubru tinan 2021 no sei termina ka ensera iha loron 31 fulan-marsu tinan 2022.

Livru 69 ne’e kompostu hosi tema 20 no broxura ho tema lima (5) ho ninia totál hamutuk 250.

Livru hirak ne’e ho nia títulu; From the Hands of Our Ancestors, As Uma Lulik do Distrito de Ainaro, The Living Heritage of Comunities in Timor-Leste, A Nossa Herança, Património Arquitetónico de Origem Portuguesa de Liquiça, Património Arquitetónico de Origem Portuguesa de Díli, Kolesaun Odamatan Sira, Kolesaun Ai-To’os, Kolesaun Antoulas no The Textile of Lautem.

Títulu seluk mak The Textile of Bobonaro, The Textile of Covalima, The Textile of Baucau, Panorama Timor-Leste, Protecting the Rock Art of Tutuala, Manatuto Dança Tradicional, Oe-Cusse Dança Tradicional, Manufahi Dança Tradicional, Coleção de Estatuas do Grupo Haburas no Sana Rai.

No, Broxuras ho titlo hanesan, Protecting the Rock Art of Tutuala, A’blai Ludu Rai D’lai (Dom Boaventura), Pintura Sira iha Fatuk Lolon, Patrimóniu Moris Komunidade sira nian, no Sanan Rai de Dair Maubara.

Notísia Relevante: Expo Dubai oportunidade ba Timor-Leste atu dada investidór sira

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here