Pesoál saúde-sira halo rejistu ba sidadaun-sira atu bele vasina iha Sentru Saúde Comoro, (02/06/21). Imajen/António Gonçalves.

DILI, 02 juñu 2021 (TATOLI)—Ministériu Saúde (MS) liu hosi Diretora Jerál Prestasaun Serbisu Saúde, Odete da Silva Viegas, fó-sai katak, kualkér sidadaun ne’ebé simu ona vasina COVID-19, naran rejistadu iha sistema eletrónika no manuál ne’ebé estabelese ona.

Odete da Silva Viegas fó-sai asuntu ne’e, hodi responde preokupasaun públiku ne’ebé kestiona iha média sosiál katak, bainhira laiha kontrolu, ema balun sei halo falsifikasaun ba kartaun maski seidauk simu vasina.

Notísia relevante:Horta rejeita informasaun vasina halo ema mate

”Ema ne’ebé mak hanoin atu halo falsifikasaun ba kartaun vasina, nia rasik lakohi kontribui atu livre hosi moras COVID-19. Bainhira ema ida hetan kartaun ne’e, signifika nia vasina ona no rejistadu iha sistema eletrónika no manuál,” Odete da Silva Viegas, hateten iha otél Novo Turizmu, kuarta ne’e.

Maski nune’e, nia hatutan, bainhira iha duni kazu hanesan ne’e iha futuru, ekipa saúde sei haree atu halo kedan intervensaun no buka hatene fontes ne’e rasik mai hosi ne’ebé.

Odete Viegas fó hanoin katak, vasina ne’e ho objetivu atu proteje an hosi COVID-19, liuliu hasa’e imunidade, tanba ne’e bainhira iha ema ruma koko halo falsifikasaun ba kartaun, tenki asume responsabilidade.

Nia fó ezemplu katak, foin-daudaun mosu informasaun balun ne’ebé espalla iha média sosiál katak, iha ema balun mate tanba vasina, maibé bainhira ekipa tékniku-sira halo hela verifikasaun, ema-sira ne’e naran la mosu iha sistema, tantu manuál no eletrónika, signifika la justifikadu.

Tanba ne’e, MS konsidera ema ne’ebé espalla informasaun iha públiku, falsu tanba seidauk iha ema ne’ebé komprovadu mate tanba vasina.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here