Diretór Agro-Komérsiu no Kooperasaun Setór Privadu hosi MAP, Fernando Amaral. Imajen TATOLI/Cipriano Colo

DILI, 02 juñu 2021 (TATOLI)—Diretór Agro-Komérsiu no Kooperasaun Setór Privadu hosi Ministeriu Agrikultura no Peska (MAP), Fernando Amaral, hateten, daudaun ne’e Loja Agrikultór hahú sosa hare hosi agrikultór sira iha postu administrativu Maliana, munisípiu Bobonaro, tanba foos-rai iha Loja Agrikultór rua iha Dili hahú menus.

”Tinan 2020 to’o 2021 ne’e udan been hosi norte di’ak, tanba ne’e produsaun hare aumenta. Horiseik ita halo kompra hare iha Maliana no mantein nafatin ho presu/kilograma 40 sentavu,” Diretór informa ba Agência TATOLI, iha ninia knaar fatin, MAP, Comoro, kuarta ohin.

Notísia relevante: Foos-rai iha Loja Agrikultór Dili hahú menus

Tuir nia, agrikultór Maliana hahú halo ona prosesamentu no tempu badak nia laran iha Loja Agrikultór Dili iha fali foos-rai.

“Ohin sira komesa tetu ona, entaun sira sei mai habai no kontinua prosesa, ha’u hanoin foos-rai iha Dili laran ba konsumidór sira, semana oin hahú iha fali ona,” nia akresenta.

Nia dehan, MAP la sosa foos-rai maibé fasilita Loja Agrikultór sira hodi sosa.

“Tanba Loja Agrikultór laiha kapitál boot, entaun iha tinan ida ne’e  sosa foos-rai ho $150.000 to’o $200.000,” nia hatutan.

Nune’e, MAP komunika ona ho parte Ministériu Koordenadór Asuntu Ekonómika (MKAE) hodi bele kapitaliza Loja Agrikultór hamutuk millaun $2 atubele fornese produtu agrikultór iha loja.

Daudaun ne’e, produtu ne’ebé menus iha Loja Agrikultór iha Dili, la’ós de’it foos-rai, maibé produtu seluk hanesan, modo, tomate, no  produtu agríkola seluk tanba situasaun serka sanitária no konfinamentu domisiliáriu obrigatóriu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here