Matebian Profesór Mateus da Silva. Imajen/Espsiál

DILI, 02 juñu 2021 (TATOLI) – Família boot  Eskola Ensinu Sekundáriu Jerál 12 Novembru, Becora, Dili, “lutu-todan” tanba lakon sira-nia profesór di’ak no kompetente, Mateus da Silva (49), ne’ebé hakotu iis  tanba sofre moras komplikadu.

Profesór Mateus da Silva, husik hela família, parente, amigu no estudante-sira hosi ESJ 12 Novembru, tersa (01/06/2021), iha Gleno, Munisípiu Ermera.

Alin hosi matebian, Silviu Correia da Silva, informa matebian  Mateus da Silva hetan moras  oioin to’o estoke tanba konsumu alkóliku (tua) barak liu.

“Antes ne’e matebian apaña hela moras fuan no tensaun, maibé tanba la kuidadu an matebian sai aleijadu (stroke),” Silviu Correia da Silva, haktuir ba Agência Tatoli liuhosi telefónika, kuarta ne’e.

Hosi sorin seluk, Diretór Eskola Ensinu Sekundáriu Jerál 12 Novembru, Becora, Dili, Aniceto Pedro da Costa, hateten sira hakfodak bainhira haree iha media sosiál Facebook profesór Mateus da Silva, hakotu ona iis no sira-rasik la hatene professor Mateus ninia mate ne’e tanba moras saida.

“Ami la hasoru malu fulan rua tanba serka sanitária no konfinamentu obrigatóriu, ami la hatene nia mate tanba moras saida. Horisehik, ha’u haree iha media sosiál Facebook ha’u hakfodak. Ita atu ko’alia saida. Buat hotu sai nakukun hotu. Maibé hanesan dirijente eskola ami prepara serimónia despedida ikus ba nia molok atu lori bá ninia horik fatin,” Aniceto Pedro da Costa hateten.

Tuir Aniceto katak durante ne’e profesór Mateus asume hela kargu nu’udar divizaun estudante no hanorin mós estudante sira ho matéria dixiplina Kímika no Desportu. Matebian integra an iha eskola refere hahú iha 2010 to’o hakotu iis.

Durante tinan 19 nia laran matebian dedika an hodi fó tempu tomak hanorin iha eskola 12 Novembru, Becora, no matebian koñesidu iha profesór-maluk katak nia figura ida ne’ebé iha dixiplina maka’as, dedikasaun, pontualidade no responsabilidade tanba ema desportivu.

“Maske eskola lakon ema di’ak ida, maibé fiar ninia espíritu sei hela nafatin iha Eskola 12 Novembru,” Aniceto tenik.

Matebian  Mateus da Silva moris iha Munisípiu Baucau, Postu Administrativu Vemasse  iha tinan 1972. Profesór Mateus mate husik hela oan na’in-tolu (feto rua no mane ida).

Durante moris profesór Mateus deside hela iha Gleno ho família foun maske ninia kaben boot sei moris hela. Maibé bainhira matebian hakotu iis iha Gleno, ninia kaben boot husu atu lori hikas matebian ba moris fatin iha Vemesse-Baucau hodi halo’ot tuir tradisaun Baucau nian.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here