Eis Primeiru-Ministru, Marí Alkatiri. Imajen TATOLI/Francisco Sony

DILI, 02  juñu 2021 (TATOLI)--Eis Primeiru-Ministru, Mari Alkatiri, husu ba sidadaun hotu atu kumpre medida prevensaun COVID-19, nune’e situasaun iha rai-laran labele sai pior liután.

“Ha’u husu ba povu atu kontinua prevene-an hosi COVID-19, liuliu ita adora nafatin ita-nia maluk sira ne’ebé mate tanba COVID-19, maibé  mós tenke hanoin katak sira ne’ebé mate ona mós lakohi ita atu mate tuir tanba sira hakarak atu ita moris nafatin hodi haburas rai ne’e,” Eis Primeiru-Ministru hateten, iha Aitarak-laran, kuarta ne’e.

Líder nasionál ne’e husu mós ba sidadaun sira atu hamutuk luta kombate COVID-19 hodi fó risku ba povu no nasaun.

“Ha’u-nia preokupasaun mak bainhira iha líder ida la fiar, ne’e signifika atu dudu ita-nia povu ba mate, ne’e mak ha’u-nia preokupasaun tanba COVID-19 ne’e iha duni,” nia akresenta.

Nune’e, Alkatiri rekomenda ba Governu atu kontinua hametin autoridade hodi asegura saúde públika iha Timor-Leste.

“Estadu no Governu rasik  lakon ona autoridade atu impoin regra no iha prova katak ema mate, la’ós tanba COVID-19, maibé ho COVID-19, família mai dehan ami labele husik maibé ami tenke lori ba uma, ne’e fó risku ba saúde públika,” nia hatutan.

Tanba ne’e, nia konsidera atu asegura saúde públika, Estadu iha Direitu atu impoin, tanba la’ós ema ida mate ona, maibé entrega ba familia hodi lori ba uma atu moras ne’e  da’et fali ba ema atus ida tan.

Tuir dadus hosi Sala Situasaun, Sentru Intregradu Jestaun Krize (CIGC, sigla portugés) ne’ebé relata iha tersa (01/06), rejista kazu pozitivu 167, rekuperadu 163 no kazu ativiu 2.630.

Kazu foun 167 kompostu hosi Dili 161 no muníspiu seluk neen, ne’ebé mane 109 no feto 58.

Enkuantu, hosi totál kazu foun ne’e ho idade 12 mai kraik iha na’in-rua, idade entre tinan 12-59 na’in-163 (97,6%), idade 60 ba leten iha na’in-rua, ho proporsaun kazu sintomátiku hamutuk 6,5% no seluk asintomátiku.

Jornalistta: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here