Produtu lokál iha Merkadu Taibesi. Imajen TATOLI/António Gonçalves

DILI, 02 juñu 2021 (TATOLI)—Diretór Agro-Komérsiu no Kooperasaun Setór Privadu hosi Ministériu Agrikultura no Peska (MAP), Fernando Amaral, hateten, parte ministériu koopera ho grupu agrikultór iha munisípiu sira hodi fonese produtu agríkola iha Loja Agrikultór.

“Ami kontinua halo kooperasaun ho asosiasaun grupu agrikultór sira hanesan Akup Maliana, Asosiasaun Agrikultór Webaba, Laleia no Vemasse, Asosaiasaun Agrikultór Welaluhu no setór privadu Acelda hodi fasilita sira bele tama-sai munisípiu, hodi lori foos mai Loja Agrikultór iha Dili,” Diretór dehan ba Agência TATOLI, iha ninia knaar fatin, MAP, Comoro, kuarta ohin.

Notísia relevante: Foos-rai iha Loja Agrikultór Dili hahú menus

Tuir nia, durante ne’e Acelda sosa foos-rai hosi agrikultór hodi fa’an tutan filafali ba Loja Agrikultór.

“Acelda hanesan setór privadu ida ne’ebé maka dedika-an hodi investe liuhosi sosa produtu hosi agrikultór hanesan foos-rai, tanba ne’e ami laiha problema no halo parseiru nafatin hodi fornese foos-rai iha Loja Agrikultór hodi fornese filafali ba ita-nia konsumidór sira,” nia akresenta.

Nune’e mós, MAP kontinua koopera ho grupu agrikultór hosi Viqueque, nune’e bele fornese produtu agríkola.

“Ita hatene Viqueque hanesan iha Uatulari no Uatucarbau sei halo kolleta hare iha fulan setembru no outobru, maibé ami kontinua halo kontaktu ho sira, nune’e kuandu iha ona ami fasilita lori produtu hodi bele mai tau iha Loja Agrikultór, tanba ne’e importante tebes,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here