Eskola Ensinu Sekundáriu Tékniku Vokasionál (ESJTEKVOK) 28 novembru, Becora, Dili. Imajen/MediaONETimor.net

DILI, 02 juñu 2021 (TATOLI) – Estudante hamutuk na’in-430 iha Eskola Ensinu Sekundáriu Jerál Tékniku Vokasionál (ESJTEKVOK) 28 novembru, Becora, Dili, maioria seidauk foti rezumu matéria atu ba estuda iha uma.

“Ami profesór-sira kuaze loroloron ativu iha eskola hodi hein estudante-sira mai foti rezumu matéria. Balun foti ona, maibé barak mak seidauk foti,” Diretór ESJTEKVOK 28 novembru, Becor, Dili, Pedro Ximenes, informa ba Agência Tatoli iha nia servisu fatin, kuarta ne’e.

Pedro Ximenes, estudante-sira ne’e seidauk foti matéria tanba sira barak maka fila tiha ona ba ida-idak nia munisípiu bainhira Governu aplika serka sanitária no konfinamentu obrigatóriu iha kapitál Dili.

Eskola mós kria grupu WhatsApp atu fasilita komunikasaun no informasaun hosi profesór-sira ho alunu-sira, maibé maioria estudante la bele asesu tanba laiha telefone ka android, tanba ne’e Pedro Ximenes tenik, difikulta estudante-sira atu asesu ba matéria-sira.

Modula ne’ebé eskola parapara ona kompostu hosi matéria ka dixiplina Sósiu Kulturál  mak hanesan Lingua Portugés, Lingua Ingleza, Lingua Tetun, Teknolojia Multimedia no matéria Sientífiku nian maka Ekonomia, Matemátika, Fízika, Kímika, no Istória Kulturál, agora matéria produtivu maka Arte Gráfika ka Dezeñu Gráfika.

Eskola Ensinu Sekundáriu Tékniku Vokasionál (ESJTEKVOK) 28 novembru, Becora, iha profesór hamutuk na’in-48 kompostu hosi profesór na’in-16 kontratadu no na’in-32 permanente.

Jornalista : Tomé Amado

Editór       : Francisco Simões

 

HAKEREK NO HATÁN

Please enter your comment!
Please enter your name here