DILI, 02 juñu 2021 (TATOLI)- Komunidade Suku Tirilolo, Postu Administrativu Iliomar, Munisípiu Lautem, hola inisiativa rasik hodi hadi’a fali ponte Paifaka-Veir ne’ebé hetan estragu iha inundasaun loron 04 abríl liubá.
Notísia Relevante : Uma-kain 200 iha Suku Tirilolo-Iliomar seidauk asesu eletrisidade
Xefe Suku Tirilolo Adão Ximenes, informa komunidade Suku Tirilolo inisiativa rasik hadi’a fali ponte Paifaka-Veir tanba atu fasilita estudante-sira no komunidade bele ultrapasa hodi hala’o atividade loroloron nian.
“Ami foti inisiativa rasik hadi’a ponte ne’e, tanba dahuluk atu fasilita ita-nia estudante-sira bele ultrapasa hodi asesu prosesu aprendizajen no fasilita mós komunidade bele asesu ba merkadu, tanba komunidade Suku Tirilolo atu asesu ba eskola ka merkadu no seluk tenke liuhosi tenke hakat mota, tanba ne’e mak ami hadi’a no ponte ne’e rasik,” Adão Ximenes, haktuir ba Agência Tatoli liuhosi telefónika, kuarta ne’e.
Nia hateten, kondisaun ponte ne’e aat dezde tempu Indonézia nian to’o de’it mai agora. Nune’e. komunidade uza de’it ai-kabelak nahe iha leten hodi fasilita komunidade bele hakur mota ne’e ho seguru iha ponte leten.
Nia hatutan, materiál ne’ebé daudaun sira uza hadi’a ponte ne’e, hanesan, simente, ai-kabelak, besi no seluk tan, maibé la’ós apoiu hosi Governu, maibé komunidade hosi Suku Tirilolo rasik mak kontribui.
“Materiál ne’ebé ita uza la’ós hosi ita-nia Governu ,maibé hosi komunidade rasik katak, kada uma-kain balu hatama simente no osan tuir ida-idak nia kbiit tau hamutuk sosa ai-kabelak, no sasán seluk tan. Osan ne’ebé komunidade hatama hamutuk $5.000 mak hodi hadi’a ponte ne’e,” Adão Ximenes hateten.
Nia afirma, ponte ne’ebé daudaun sira hadi’a la’ós permanente nian, maibé provizóriu de’it, atu oinsá fasilita sira atu halo atividade loroloron nian.
“Ha’u husu ba Governu, liuliu ba ministériu relevante haree mós ba ami-nia preokupasaun sira-ne’e tanba komunidade iha área rurál presiza mak infraestrutura báziku hanesan bee-moos, estrada no eletrisidade, maibé to’o agora realidade ita-nia komunidade barak mak sei enfrenta ba problema hirak ne’e,” Xefe Suku Tirilolo, Adão Ximenes hateten.
Espera katak ba oin, nia dehan, Governu bele ajuda komunidade Suku Tirilolo maibé la’ós atu hadi’a de’it mak ponte, mas bele hadi’a mós estrada ligasaun Postu Administrativu Iliomar ba Munisípiu Lautem tanba kondisaun estrada dezde Indonézia nia tempu to’o agora grave tebes.
Suku Tirilolo, Postu Administrativu Iliomar, kompostu hosi aldeia tolu (3) mak hanesan Aldeia Tirilolo, Etevata no Tatalarilarin ho totál populasaun hamutuk 2.464.
Jornalista : Arminda Fonseca
Editór : Francisco Simões
