IGE-empreza nasionál normaliza estrada iha área Bebonuk ne’ebé hetan estagu tanba dezastre naturál iha domingu (04/04). Imajen TATOLI/António Gonçalves

DILI, 02 juñu 2021 (TATOLI)--Ekipa task force hosi Diresaun Nasionál Obra Públika (MOP) no Ministériu Planu no Ordenamentu (MPO), hahú halo dezeñu no Bill of Quantity (BoQ) atu rekupera imediata estrada no ponte iha fatin hitu ne’ebé hetan estragu maka’as hosi dezastre naturál ne’ebé akontese iha loron 04 abríl.

Ministru Obra Públiku, Salvador Eugênio Soares dos Reis Pires, informa, projetu ualu ne’ebé Konsellu Administrasaun Fundu Infraesturutura (KAFI) deside atu halo rekuperasaun imediata mak hanesan estrada iha Embaixada Japaun nian oin ne’ebé konklui ona, no hitu seluk hanesan ponte no estrada bá Maloa, estrada bá Ailok-laran, estrada Bebonuk, ponte Bekusi, estrada iha Hospital Nacional Guido Valadares (HNGV) nia kotuk, no estrada iha ponte CPLP bá Bebonuk.

Notísia relevante: Hahú aban, transporte bele asesu ona estrada Embaixada Japaun oin

“Ekipa task force halo planifikasaun, hafoin Ajénsia Dezenvolvimentu Nasionál (ADN) halo verfikasaun, maibé iha ona dezeñu rua ka tolu mak finaliza no verfikadu ona, enkuantu sira seluk tenke halo retifikasaun dezeñu. Ha’u husu ona ba sira atu aselera hodi lori ba KAFI halo desizaun no mobilizasaun ba rekonstrusaun,” Ministru hateten iha edifísiu Ministériu Finansa, Aitarak-laran, kuarta ne’e.

Tuir kálkulu, orsamentu ba rekuperasaun obra iha fatin hitu ho kategoria imediata, ho kustu millaun $5.

Kona-ba estragu iha territóriu tomak, provizoriamente ekipa téknika sira finaliza ona kualifikasaun liuhosi fahe ekipa ba rejiaun oeste, leste no sentru.

“Estragu ne’e antes identifika iha lokál 101, maibé hafoin ekipa verifika fali obra ponte, estrada no cheia, hetan estagu tun ba 97,” nia informa.

Notísia relevante: Kustu estimasaun estragu infraestrutura iha lokál 101 hamutuk millaun $245

Daudaun ne’e, ekipa task force prepara hela relatóriu finál atu entrega ba MOP no MPO.

“Ami-nia tékniku sira sei prepara relatóriu tanba estragu komplexa presiza tempu atu halo planu no mitigasaun hodi tau ba ezekusaun normál, tuir orientasaun Primeiru-Ministru tanba presiza halo estudu,” nia  esplika.

Maibé, ba estragu simples sira, sei halo hela planifikasaun no dezeñu atu halo rekonstrusaun, hafoin hetan aprovasaun iha KAFI.

Notísia relevante: Governu klasifika projetu reabilitasaun estruturál impaktu dezastre naturál

Estragu ponte, estrada no cheia  iha territóriu nasionál hamutuk 97 ho kustu orsamentu ba rekuperasaun hamutuk milaun $245.

“Ita hein rezultadu verfikasaun no kualifikasaun, nune’e iha tempu badak sira aprezenta hafoin ita hatene danu komplexu no simples hira, relatóriu sei iha prosesu elaborasaun,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here