IOB Timor-Leste

DILI, 01 juñu 2021 (TATOLI)—Reitór Institute Of Bussines (IOB), Pedro Ximenes, tersa ne’e, promete hakarak atu reforsa iha programa kapasitasaun rekursu umanu liliu formasaun espesífiku ba dosente sira hodi garante kualidade ensinu iha prosesu aprendizazén.

“Ita sei fó oportunidade ba dosente sira  ne’e atu hasa’e tan sira-nia grau akadémiku atu labele iha tan lisensiatura (S1) iha IOB,”Reitór IOB foun ne’e hateten hafoin simu pose husi Prezidente Fundasaun, Klibur Mata Dalan ba Kooperativa no Fila Liman, Abel da Costa Ximenes, iha Fomento Dili.

Daudaun ne’e, Nia esplika ensinu superiór privada ne’e iha ona dosente hamutuk ema na’in 129, maioria hasai ona grau mestradu no lisensiatura maibé sei kontinua ba halo tan estudu hodi hasai grau doutoramentu.

Aleinde, kapasitasaun rekursu umanu, Pedro Ximenes, iha mós planu prioridade seluk  tan maka atu implementa durante tinan haat iha ninia mandatu hahú 2021 to’o 2024.

Nia klarifika planu hirak ne’e maka reforsa iha kualidade ensinu durante prosesu aprendizazen via online iha situasaun pandemia COVID-19, reforsa iha área peskiza, hadi’a kualidade institusionál no seluk tan.

“Ha’u sei fó atensaun maka’as hodi asegura ita-nia estudante sira atu asesu ensinu aprendizazen ho kualidade iha situasaun ida agora. Ha’u sei retoma fali kondisaun hotu kuandu situasaun kampus normaliza hikas atu estudante sira labele lakon oportunidade iha aula prezensiál, ha’u sei hadi’a kualidade IOB nian atu bele kontribui di’ak liután ba nasaun iha futuru, no mós ha’u sei reforsa programa peskiza atu dosente sira bele peskiza tuir área espesífiku sira,” Pedro hatutan.

Iha biban seluk, Reitór IOB sesante, Augosto da Conceição Soares, hato’o agradese wain ba Fundasaun, Klibur Mata Dalan ba Kooperativa no Fila Liman tanba jere no lidera ona IOB durante tinan 19.

“Ha’u sei la haluha di’ak tomak ne’ebé fundasaun fo, konfiansa ne’ebé ha’u simu tanba konsege halo ona parseria ho instituisaun ensinu superiór privadu sira iha nasaun seluk inklui universidade Brawijaya Indonézia ida ne’e previlejiu bo’ot ida ha’u hetan durante assume papel nu’udar Reitór IOB,”Nia dehan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here