Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 01 juñu 2021 (TATOLI)—Prezidente Tribunál Rekursu (PTR), Deolindo dos Santos, tersa ne’e relata servisu Kámara Konta nian ba Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili.

Notísia Relevante: Governu kompromete implementa rekomendasaun Kámara Konta no Komisaun C

Deolindo dos Santos hateten, nia parte relata kona-ba plenária Kámara Konta ne’ebé aprova ona relatóriu anual 2021 nian ne’ebé haruka ona ba Prezidente Repúbika, Primeiru-Ministru, no Prezidente Parlamentu Nasionál atu halo apresiasaun kona-ba servisu ne’ebé Kámara Konta halo durante tinan ida-nia laran.

“Ida-ne’e mak ha’u hato’o ba Prezidente Repúblika no apresizaun hosi Prezidente Repúblika di’ak. Ha’u hato’o ba Prezidente Repúblika katak maske kazu infesaun COVID-19 sa’e makaas, maibé Tribunál Rekursu mantein hala’o servisu loro-loro nian ho di’ak,” Prezidente Tribunál Rekursu hateten ba jornalista sira, hafoin hala’o enkontru ho Prezidente Repúblika, tersa ne’e.

Iha enkontru ne’e, nia hatutan, Prezidente Repúblika husu atu Tribunál sira servisu nafatin ho forma ne’ebé di’ak no husu atu bele Konsellu Superior Majislatura Judisiál nu’udar orgaun ne’ebé kontrolla juis sira, atu bele funsióna ho forma ne’ebé di’ak liután atu bele servisu Tribunál nian ne’e bele la’o di’ak liután.

Notísia Relevante: Bankada CNRT apresia relatóriu Kámara Konta iha OJE 2019

Kona-ba julgamentu kazu iha pandemia COVID-19 no kalamidade, Prezidente Tribunál Rekursu ne’e hateten prosesu sira-ne’e labele suspende tanba tau enkauza direitu liberdade ema nian, trata kestaun fundamentál sira-ne’ebé lei regula ne’e mak tenke la’o nafatin kuaze iha Tribunál hotu funsióna ho normál inklui mós Tribunál Rekursu.

“Tribunál Rekursu ha’u dehan laiha difikuldade ruma kona-ba andamentu normál prosesu mak iha, tanba kuaze prosesu sira-ne’ebé iha ne’ebá ne’e hotu-hotu la’o normal, laiha ona pendente ka akumuladu hanesan uluk, ida-ne’e mak la’o,” nia haktuir.

Iha lei Nú. 9/2011, 17 Agosto, ne’e haktuir; ‘Aprovou a orgânica da Câmara de Contas do Tribunal Administrativo, Fiscal e de Contas, que tem por função fiscalizar a legalidade e regularidade das receitas e das despesas públicas, apreciar a boa gestão financeira e a efetiva responsabilidade por infracções financeiras’.

Antes ne’e, iha 20 outubru 2020, Governu husu Kámara Konta atu halo auditoria ba instituisaun Estadu sira. Ba ida-ne’e, Prezidente Tribunál Rekursu husu ba Kámara Konta atu fó prioridade ba pedidu hosi Governu atu bele aprova iha plenária Kámara Konta nian.

Notísia Relevante: PFMO realiza formasaun ba auditór Kámara Konta

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here