Komandante Jerál PNTL,, Komísariu Faustino da Costa. Imajen TATOLI/Egas Cristovão

DILI, 01 Juñu 2021 (TATOLI)—Polísia Nasionál Timor Leste (PNTL), sei halo investigasaun ba sidadaun ka broker ne’ebé hala’o transaksaun ilegál ba motór no karreta hosi nasaun viziñu Indonézia mai Timor-Leste (TL).

Komandante Jerál PNTL, Komisáriu Polísia, Faustino da Costa orienta ona ekipa atu halo investigasaun tanba autór ne’ebé autoridade seguransa Indonézia detein, sei iha ligasaun ho kazu hatama motór no karreta mai Timor-Leste ho dokumentu la kompletu.

Notísia relevante:UPF detein timoroan 30 tama ilegál hosi fronteira

Faustino da Costa husu ba Komandante Serbisu Informasaun Polísia (SIP) Superintendente Boavida Ribeiro, atu rekolla informasaun hosi instituisaun relevante-sira ne’ebé serbisu hodi fasilita prosesu importasaun transporte hirak-ne’e mai TL.

“Kapturasaun ba grupu organizadu ne’ebé hala’o atividade iha Indonézia ho objetivu finál mai Timor-Leste, sai hanesan responsabilidade ba xefe SIP foun ho-nia membru-sira. Tenke haree prosesu ba oin ho informasaun másima, haree parte relevante-sira atu indentifika informasaun-sira ne’ebé ohin loron sirkula, labele akontese iha TL,” Faustino da Costa hateten iha diskursu serimónia pose ba Komandante SIP, Superintendente Boavida Ribeiro, iha Komandu Jerál PNTL, Caicoli, tersa ne’e.

Komandante Jerál ne’e enkoraja Komandante SIP foun atu labele lakon esperansa, maski investigasaun ba grupu organizadu la’ós fásil, maibé presiza sakrifika tempu no dedikasaun hodi hetan dadus ne’ebé PNTL presiza.

Iha parte seluk, Vise Ministru Interiór, António Armindo husu ba Komandu PNTL atu investiga didi’ak kazu motór no karreta ilegál ne’ebé deskunfia tama hosi Indonézia.

António Armindo  preokupa no husu SIP atu halo investigasaun ba  autór-sira ne’ebé involve iha rede organizadu no prosesa tuir lei nune’e evita kazu hirak-ne’e labele akontese iha futuru.

“Ha’u fó ona orientasaun ba Komandante Jerál PNTL, Unidade Polísia Fronteira (UPF), Alfándega no Imigrasaun atu serbisu hamutuk hodi asegura no ajuda halo prevensaun,” nia subliña.

Nia mós husu atu buka-tuir no halo investigasaun ba motór no karreta hirak ne’ebé hatama ona mai Timor-Leste.

Tuir média online hosi Indonézia ho naran Semarang.bisnis.com halo publikasaun iha 29 maiu 2021 katak, autoridade Seguransa Indonézia detein suspeitu na’in-sia (9) no halo apreensaun ba motór hamutuk 325 inklui karreta 41 ne’ebé laiha dokumentu atu haruka ilegál mai Timor-Leste liu hosi portu Tanjung Emas Semarang-Indonézia.

Motorizada 325 no karreta 41 ne’e, autoridade Indonézia identifika laiha dokumentu no halo kedan apreensaun, antes atu halo esportasaun ba Singapura mai Timor-Leste.

Iha 19 maiu 2021, autoridade seguransa Indonézia konsege kaptura autór balun  uza kontainer tula karreta 11 no motór 57 iha área suku Gadingrejo, postu administrativu Juwana, munisípiu Pati-Indonézia.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here