Médiku-sira Ospitál Nasionál Guido Valadares (HNGV sígla portugés), hala’o hela operasaun ba rama-ambon iha Nívio Mariano Carvalho de Jesus ninia matan-fukun. Imajen/HNGV.

DILI, 01 juñu 2021 (TATOLI)—Polísia Nasionál Timor Leste (PNTL) komandu munisípiu Baucau, detein ona suspeitu na’in-rua ne’ebé deskonfia lori rama-ambon hana kanek vítima Nívio Mariano Carvalho de Jesus (21), iha matan-fukun bainhira tuur hela iha rezidénsia-oin bairru Sentrál, suku Bahu, postu administrativu Baucau Vila, munisipiu Baucau, kinta (27/05) tuku 18:00 otl.

Portavóz Komandu Jerál PNTL, Superintendente Xefe, Arnaldo de Araújo, esplika parte PNTL seidauk bele fó-sai identidade suspeitu-sira ne’ebé kapturadu iha aldeia Lutumutu, suku Trilolo, postu administrativu Baucau Vila, tanba iha hela prosesu detensaun no investigasaun.

Notísia relevante:Ema deskoñesidu hana Nívio Carvalho ho rama-ambon iha matan-fukun

“Suspeitu-sira polísia de’it ona no sira-nia identidade seidauk bele fó-sai tanba kazu ne’e rejistu ona iha Ministériu Públiku,” Arnaldo de Araújo hateten ba jornalista-sira liu hosi konferénsia imprensa, iha Komandu Jerál PNTL, Caicoli, tersa ne’e.

Kazu ne’e akontese iha kinta (27/05) tuku 18:00 otl, bainhira vítima tuur hela iha ninia uma oin, derrepente ema deskoñesidu na’in-rua taka oin metin ho motór ida la’o neneik hodi lori rama-ambon hana kona kedan vítima ninia matan-fukun parte kuana, rezulta rama-ambon tama borus vítima ninia mata-fukun.

Oras-ne’e daudaun vítima hala’o ona prosesu autopsia hodi hasai rama-ambon iha sala izolamentu Vera Cruz Dili.

Vitima pozitivu COVID-19

Portavóz PNTL mós fó-sai katak, parte PNTL Baucau seidauk bele rekolla informasaun hosi vítima, tanba hafoin vitima hetan hana, no médiku-sira halo kedan teste swab ba vitima ho rezultadu pozitivu COVID-19, nune’e vítima sei hala’o tratamentu saúde iha sala izolamentu Vera Cruz Dili, to’o loron 14.

“Agora dadadaun vítima sei hela iha sentru izolamentu Vera Cruz, tanba pozitivu COVID-19,” Arnaldo de Araújo, hateten.

PNTL mós sei hein bainhira vítima rekopera hosi COVID-19 mak bele husu atu relata dadus kona-bá kazu ne’e.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here