Profisionál saúde-sira hala’o teste swab ba abitante iha sede suku Caicoli, sesta (07/05). Imajen Tatoli/António Gonçalves.

DILI, 01 juñu 2021 (TATOLI)—Ministériu Saúde (MS), liu hosi Unidade Promosaun Edukasaun Saúde, kontinua hala’o kampaña ba prevensaun COVID-19, liuliu halo sensibilizasaun ba populasaun iha territóriu tomak.

“Kampaña la’o nafatin, ita fahe informasaun atu eduka povu, liuliu iha medida prevensaun-nian,” Xefe Unidade Promosaun Edukasaun Saúde, Misliza Vital, hateten ba jornalista Agência Tatoli iha Caicoli, tersa ne’e.

Notísia relevante:OPS ho lider komunitáriu partisipa sensibilizasaun kona-ba prevensaun COVID-19

Oras-ne’e daudaun Komisaun nasionál ba prevensaun COVID-19 liu hosi Pilár II hamutuk ho parseiru-sira hala’o serbisu, liuhosi meiu komunikasaun oioin iha baze oinsá bele luta hamutuk kombate surtu ne’e.

”Durante ne’e ita la’o tama-sai uma no mós ita halo sensibilizasaun liu hosi televizaun, la’ós iha Dili de’it, maibé mós iha munisípiu-sira,” Misliza Vital, esplika.

Kona-bá difikuldade ne’ebé durante enfrenta maka, iha populasaun balun ne’ebé difísil atu halo-tuir regra prevensaun-nian, maibé parte Pilár II haree katak, maioria populasaun iha ona konsiénsia atu halo tuir.

Durante ne’e Unidade Promosaun Edukasaun Saúde hetan apoiu hosi parseiru-sira ba prevensaun-nian mak hanesan, Organizasaun Mundiál Saúde (OMS), Unicef, Katalpa, Cruz Vermelha Timor Leste (CVTL) Wordvision, Oxfam,  Care internasionál no seluk-tan.

Entretantu, regra jerál ba prevensaun COVID-19 maka uza máskara, fase liman bebeik ho sabaun ka uza dezinfektante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka haku’ak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here