Vendedór Guido Sempre dudu gerobak (karosa) faan modo-tahan. Imajen Tatoli/Nelia Fernandes.

DILI, 01 juñu 2021 (TATOLI)—Ba Guido Sempre, “moris ne’e hanesan prosesu la’o-rai ida-nian la’os objetivu ida”. Hosi dadeersan to’o loromatan ne’e baruk no toba dukur (kalan), nia hala’o ninia moris hanesan “la’o-rai” ida-ne’ebé la’o lemo-lemo buka moris atu moris, no buka “objetivu” ida hodi hetan osan no bele sustenta oan sira iha uma.

Nu’udar “la’o-rai” ida iha rai ne’e, dadeersan hadau malu ho fitun-mutin be sa’e daudaun, haloot modo-tahan iha gerobak (karosa) laran, tara pasta nemlele iha hirus-matan, doku xapeo iha ulun, liman karuk ne’e dudu gerobak, la’o tuir dalan leet sira iha sidade Dili nia laran hodi buka doit (osan) oan ruma atu hatutan moris.

“Dadeersan tuku neen (06.00), ha’u dudu gerobak la’o haleu Dili laran hodi buka moris. Haree ba besik tuku 12.00 meudia, ha’u komesa la’o fila ba uma dada iis hamutuk ho família. Depois iha tuku 17.00 lorokraik, dudu fali gerobak be nakonu ho modo-tahan sai fali ba Dili laran hodi faan modo-tahan. Kalan tuku 19.00, fila ba uma hodi deskansa hamutuk hoa ho oan sira iha uma,” Vendedór Guido Sempre hateten ba Agência TATOLI, iha Merkadu Taibesi, tersa ne’’e.

Maske nia moris hanesan ema ho defisiénsia (liman-kuana laek ka kotu), vendedór ne’ebé hosi munisípiu Bobonaro ne’e, la sente mõe bainhira hala’o moris hanesan faan modo-tahan. Nia la móe no la tauk, tanba liuhosi dalan moris ida-ne’e (vendedor) mak nia bele hetan netik osan-dolar ida ($1) hodi sustenta moris loro-loron nian.

Atu hetan netik osan, nia hanesan ”la’o-rai” ida-ne’ebé mout iha prosesu la’o-rai ne’e nia laran hodi hisik kosar-been rasik atu hadau “objetivu” ida. Atu hadau moris ne’e nia kmanek, nia tenke lakon tempu tomak iha dalan ninin, la’o sees hosi família, ho objetivu ida faan modo-tahan lemo-lemo atu ema bele sosa.

Di’ak ka aat, ho mehi no prinsípiu moris ne’ebé nia hah’i, hamriik iha nia ain leten, nia sei la tane liman ba ema seluk. Di’ak ka aat, buka rasik mak hetan. Aat ka di’ak,  moris ho ninia kosar-been rasik.

“Ha’u sente la iha tempu atu halimar ho oan sira. Moris di’ak no aat ita mak buka rasik, atu ita labele tane liman ba ema seluk. Bainhira ita tane liman ba ema, ne’e la di’ak. Nune’e, ita tenke pasiénsia, esforsu ita-nia aan buka osan, hodi sustenta ita-nia moris no familia. Tanbá ema seluk bele, nusa mak ita labele,” nia dehan.

Ho pasiénsia, maske ho pandemia COVID-19 no kalamidade, nia esforsu-aan la’o buka moris atyu moris nafatin. Nia dudu gerobak (karosa) be nakonu ho modo-tahan, nia tenke hada’u malu ho vendedór seluk hodi hada’u netik osan ruma hosi kompradór sira. Maske dalaruma ema la duun sosa no rendimentu menus, maibé nia simu ho laran haksolok.

“Agora araska uitoan, la hanesan uluk, tanba agora ita hetan de’it $10 no $15. Maibé, iha situasaun normal ne’e ema hola modo barak, no loron ida ema bele hola modo to’o $30 ka $40, no to’o fulan ida-nia laran ne’e, ita bele hetan $1000,” nia dehan.

Osan ne’ebé nia hetan liuhosi faan modo-tahan ne’e, nia haktuir sei sosa fali modo-tahan para bele faan fila-fali no bele hetan osan. Tanba, modo-tahan sira-ne’e, nia sosa fali hosi ema ka modo-na’’in sira-ne’ebé lori modo-tahan hosi Hera ninian.

“Osan balun ne’ebé ha’u hetan no tau hamutuk ne’e, ha’u uza balun hodi halo ha’u-nia uma,” nia dehan.

Guido Sempre hala’o atividade faaan modo-tahan ne’e hahú iha 2007 to’o ohin loron. Ba nia, laiha tan dalan seluk atu buka servisu, tanba nia moris ho kondisaun ema ho defisiénsia.

“Ha’u lakon ha’u-nia liman tanba uluk tuir bus mak hetan asidente to’o ha’u lakon liman-kuana ne’’e. Uluk ha’u tuir bus, iha 2004 bus baku fila iha Tasi-Tolu mak halo ha’u nia kondisaun sai tiha hanesan ne’e,” Gido Sempre ne’ebé kaben ho Nina Fernandes (oan-feto rua) ne’ebé hela iha Merkadu Taibese ne’e haktuir.

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here