Ministru Koordenadór Asuntu Ekonómiku, Joaquim Amaral, no Ministru Petróleu no Minerál, Víctor da Conceição Soares, halo vizita ba DFBC, Colmera, tersa (01/06). Imajen TATOLI/Egas Cristóvão

DILI, 01 juñu 2021 (TATOLI)–Ministru Koordenadór Asuntu Ekonómika (MKAE), Joaquim Amaral, halo vizita ba Dili Financial Bussiness Center (DFBC), Colmera, hodi bele notifika ba responsável sira hodi aselera konstrusaun.

“Padraun konstrusaun ne’ebé maka sira uza, inklui materiál sira hanesan ahi, bee no seluk tan, sira adopta sistema Europa no Amérika. Vizita ne’e hodi hatudu apoiu Governu ba konstrusaun ne’e hodi bele aselera hodi finaliza obra iha tempu ne’ebé determina ona,” Ministru dehan iha resintu DFBC, tersa ne’e.

Iha fatin hanesan, Prezidente DFBC, Alexandre Corto, hateten, konstrusaun ne’e bele realiza ho kooperasaun ho Governu Timor-Leste iha tinan 2010.

“Agora difikuldade ba ami maka atu mobiliza sasán hosi li’ur mai tanba situasaun, ami-nia engeñeiru tékniku no materiál iha ne’e, maibé ho vizita ne’e ita hotu buka dalan nune’e bele rezolve kestaun ne’e atu ita bele finaliza obra ne’e tuir tempu ne’ebé determina. Maski nune’e ami fiar sei termina obra ne’e iha tinan 2022,” nia dehan.

Tuir Responsável ne’e, konstrusaun hahú iha tinan 2013 no to’o ohin loron obra ne’e atinje ona 60%, ho kustu ba konstrusaun hamutuk millaun $30.

Antes ne’e, Governu Timor-Leste, liuhosi Ministériu Ekonomia no Dezenvolvimentu, no empreza ENSULMECI asina akordu iha loron 13 abríl 2010, ne’ebé marka inísiu ba projetu importante ida hodi haburas ekonomia no dezenvolvimentu sosiál.

Projetu ne’e hodi harii sentru urbanu ida, nu’udar modelu no boot liu iha sidade Dili, hodi fó espasu oin-oin hanesan uma hela, servisu fatin, otelaria no ekipamentu sosiál, ne’ebé sei kontribui ba valorizasaun urbana, ekonómika, sosiál no ambientál sidade.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here