Atendimentu kliente iha sukursál BNCTL. Imajen/BNCTL

DILI, 01 juñu 2021 (TATOLI)—Governu liuhosi Ministériu Koodernadór Asuntu Ekonómiku (MKAE), planeia kontinua investe iha Banku Nasionál Komérsiu Timor-Leste (BNCTL) atu fó kréditu ba setór privadu halo negósiu.

“Ita-nia planu kada tinan mak kapitalizasaun Banku Nasionál Komérsiu Timor-Leste atu kontinua fó kréditu barak liu ba ema no empreza sira, hodi halo atividade ekonómika,” Ministru Koordenadór Asuntu Ekonómiku, Joaquim Amaral, hateten iha Colmera  Dili, tersa ne’e.

Polítika VIII Governu Konstitusionál mak kapitaliza BNCTL hodi fasilita empréstimu atu estimula ekonomia, hamenus dezempregu no harii dalan di’ak ba kreximentu ekonómiku no reziliénsia.

Ministru konsidera, BNCTL nu’udár banku Estadu Timor-Leste, ne’ebé presiza iha fundu atu fó empéstimu ba sidadaun.

Iha orsamentu 2021, Governu kapitaliza BNCTL milaun $40 atu fó empréstimu ba ema no empreza sira, nune’e evita labele monu ba falénsia no sei estimula entidade hirak ne’e atu foti impréstimu hodi sustenta kompra, trabaladór no halo investifmentu.

“Ita planeia hela iha orsamentu Jerál Estadu 2022, ita propoin orsamentu liu ida tinan ne’e (2021) atu reforsa kapitalizasaun Banku Nasionál Komérsiu Timor-Leste hodi fó kréditu ba setór privadu sira,” nia hatutan.

Tuir dadus SERVE,  to’o 31 dezembru 2020  konsege rejista empreza foun hamutuk 31.000  kompostu hosi tipu empreza hanesan ENI, Unipesoál Lda, porqunatos Lda, Sosiál anónimu Lda, empreza públiku, no empreza internasionál.

Totál empreza 31.000 (98%) hanesan empreza nasionál no empreza internasionál internasionál hamutuk 100 ho 2%.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here