Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 01 juñu 2021 (TATOLI)—Komandu Jerál Polísia Nasionál Timor-Leste (PNTL) liu hosi Departementu Justisa, prosesa ona kazu membru balun ne’ebé deskonfia envolve iha kazu tiru no baku abitante-sira.

Komandante Jerál PNTL, Komisáriu Polísia, Faustino da Costa esplika prosesu investigasaun ba membru ida ne’ebé deskonfia tiru joven na’in-rua iha suku Caicoli, kazu membru na’in-rua baku negosiante ida iha merkadu Tasi-tolu no Liquiça, parte jurídiku prosesa ona.

Notísia relevante:Kazu baku Octavio Thal, PDHJ hato’o auto-notísia krime ba MP

Nia hatutan, bainhira iha prosesu ne’e maka detekta-duni membru hirak-ne’e halo sala iha terrenu, Komandu sei fó sansaun tuir lei dixiplinár foun PNTL.

“Agora prosesu la’o hela no balun ita konsege halo ona mudansa ba fatin serbisu, tanba ninia andamentu ba prosesu investigasaun mós ami aprezenta ona ba Governu,” Faustino da Costa hateten ba jornalista-sira iha Komandu Jerál PNTL, Caicoli, tersa ne’e.

Komandante Jerál ne’e apela ba membru PNTL tomak atu kuidadu hala’o serbisu ho profisionál, tanba doutorina instituisaun la orienta atu kualkér polísia halo atuasaun baku no tiru populasaun arbiru, maibé bainhira komunidade koko kontra regra ruma, polísia iha devér halo atuasaun ba problema ho forsa.

Nune’e mós portavóz PNTL, Superintendente Xefe, Arnaldo de Araujo esplika detallada katak, kazu okum polísia ida ne’ebé tiru joven na’in-rua iha suku Caicoli prosesa ona.  

Nune’e mós kazu pesoál PNTL baku negosiante ida iha Tasi-tolu, Taibesi no kazu oknum polísia ida baku abitante iha iha suku Hatukesi-Liquiça iha 25 maiu 2021, tuku 17:40 otl hein de’it desizaun hosi Departementu Justisa.

“Kazu Tasi-tolu prosesu dixiplinár ba membru-sira fó ona notifikasaun,” nia hateten.

Entretantu vízitima ba kazu Tasi-tolu rasik aprezenta ona keixa ba parte Provedoria Direitu Umanu no Justisa (PDHJ sígla portugés), hodi prosesa kazu ne’e ba Tribunál.

Notísia relevante:PNTL aprezenta kazu oknum polísia tiru joven na’in-rua ba MP

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here