Ministru Obra Públika, Salvador Eugênio Soares dos Reis Pires, halo intervensaun iha estrada foun iha suku Osouala, segunda (31/05). Imajen/MOP

DILI, 01 juñu 2021 (TATOLI)–Ministru Obra Públika, Salvador Eugênio Soares dos Reis Pires, halo observasaun no vizita atividade loke estrada foun kilómetru 7 hosi ekipa Institutu Jestaun Ekipamentu, Institutu Públiku (IGE, I.P) iha suku Osouala, postu administrativu Vemasse, munisípiu Baucau.

Iha ámbitu ne’e Ministru hateten, VIII Governu Konstitusionál iha polítika hakarak promove atu fó espasu ba komunidade halo atividade ba sira-nia moris di’ak.

“Atu moris di’ak, ita tenke fornese dalan, eletrisidade, bee-moos.  Tanba ne’e, Governu  presiza rekursu atu tau-matan ba nesesidade povu nian iha teritóriu tomak,” Ministru hateten liuhosi nota ne’ebé Agência TATOLI asesu, tersa ne’e.

Governante ne’e esplika, programa hanesan loke estrada foun, atendimentu estrada rurál no estrada munisipál presiza rekursu finanseiru inklui tempu barak.

“IGE hakarak ajuda populasaun halo di’ak estrada hodi asesu ba atividade hotu, liga ho ita-boot sira-nia moris di’ak, liuliu lori produtu lokál ba merkadu no fatin seluk, ne’e mak ita tenta halo. Ami kontente bele realiza liuhosi IGE nia servisu loke estrada,” nia akresenta.

Tuir Ministru, Governu nunka haluha sidadaun ida, maibé kbiit no forsa Governu nian mak la to’o atu halo dala-ida de’it, tanba ne’e, Governu halo neineik atu populasaun bele asesu hotu.

Iha biban hanesan, Prezidente IGE, I.P, Hermenegilda Laurentina, agradese ba disponibilidade Ministru hodi vizita no observa atividade loke dalan ne’e.

Proposta loke estrada hahú iha tinan 2019, maibé to’o tinan 2021 mak IGE,I.P orienta enjiñeiru ba terrenu atu foti dadus ho prosesu administrasaun no ikus mai hahú loke dalan.

Estrada foun iha Osouala ho distánsia kilómetru 7 resin, ne’ebé kilómetru 3 resin loke estrada foun no kilómentru 4 resin ba aterru estrada.

Iha vizita ne’e, autoridade lokál hato’o preokupasaun ba MOP atu tau-matan kona-ba estrada, eletrisidade no bee-moos.

Atividade vizita ne’e akompaña hosi Diretór Jerál Administrasaun no Finansa (DJAF), Januário Barbosa, Jestór Unidade Manajementu Projetu, Sidónio Amaral Freitas, Vogál sira hosi IGE  inklui tékniku sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here