Eis Prezidente Repúblika, José Ramos Horta. Imajen TATOLI/Egas Cristóvão

DILI, 01 juñu 2021 (TATOLI)-Eis Prezidente Repúblika, José Ramos Horta, sujere ba Governu atu fó prioridade vasina kontra COVID-19 ba negosiante no motorista transporte públiku.

“Inisiativa Governu ne’e di’ak, tanba se negosiante roda tolu, motorista ba transporte públiku, no negosiante sira iha merkadu hetan vasina, entaun ekonomia komesa la’o no roda ekonomia komesa la’o, no negosiante roda tolu sira bele la’o avontade,” Horta hateten hafoin hala’o enkontru ho Primeiru-Ministru (PM), Taur Matan Ruak, iha Rezidénsia Farol, tersa ne’e.

Kestaun ne’e, nia konkorda ho desizaun Xefe Governu, ne’ebé bainhira halo vasina kompleta ona (dala-rua), bele halo viajen avontade iha territóriu nasionál sein halo teste swab.

Notísia relevante: Governu deklara sidadaun simu vasina kompleta livre sirkulasaun sein teste

“Governu la halo desizaun arbiru, ha’u fiar iha rai ida-ne’e iha ema ida akompaña problema pandemia no siénsia liu fali ha’u. Ha’u ko’alia ho sientista ne’ebé agora daudaun iha Israel, Alemaña ne’ebé sira estuda kona-ba COVID-19 no variante oin-oin, laiha ema ida bainhira vasina bele proteje ema 100%, maibé proteje bele to’o 90% no vasina ona mak hetan moras karik  sei la moras boot tanba vasina proteje,” nia subliña.

Horta hatutan, programa Governu bele kontinua ba sé mak prioridade liu hetan vasina, maibé presiza fó prioridade ba negosiante no motorista sira.

“Governu hakat ba merkadu sira hodi fó vasina ne’e, signifika ekonomia kiik komesa book-an, tanba realidade iha dalan ninin sira iha munisípiu ne’ebé antes ne’e ema fa’an sasán barak, maibé agora mamuk loos, ne’e tanba konfinamentu oho ekonomia,” nia hatutan.

Hafoin relata preokupasaun ne’e, PM Taur konkorda ho inisiativa ne’e no sei ko’alia ho Ministériu Saúde hodi realiza.

“Primeiru-Ministru simu ha’u-nia ideia ne’e no sei ko’alia ho tékniku sira,” Horta haktuir.

Konsellu Ministru mós deside ona sidadaun ho sertifikasaun vasina kompleta bele livre halo sirkulasaun sein halo teste.

To’o loron 28 maiu, rejista ona sidadaun hamutuk 76.683 mak simu ona vasina AstraZeneca.

Jornalista: Antónia Gusmão

Editora: Julia Chatarina

1 KOMENTÁRIU

  1. hau jusere atu hatene tuir lolos vasina nebe balun lansa iha media social katak bainhira simu ona vasina ema sira nia durasaun moris la to tinan 2, ne oin sa presiza klarefikasaun govenu nian ba povo
    atu komprende diak liutan selae ema be la kopende bele sai tauk liu atu ba simu vasina.

HAKEREK NO HATÁN

Please enter your comment!
Please enter your name here