Kondisaun Sentru Izolamentu Ospitál Lahane, tersa (02/03). Imajen Tatoli/António Gonçalves.

DILI, 01 junu 2021 (TATOLI)—Governu liuhosi Ministériu Saúde (MS), to’o oras-ne’e kontrata no utiliza otél ho edifísiu públiku hamutuk 27 iha Dili ba sala izolamentu no kuarentena COVID-19.

Hosi númeru ne’e, otél no edifísiu públiku ne’ebé Governu utiliza ba izolamentu hamutuk 12 mak hanesan otél Fortuna, Novo Horizonte, Luz Clarita, otél SK, otél Vila Verde, otél Leokase, otél D’City, Apartament Eternity, koléjiu akademia polísia Comoro, Palásiu Nobre Lahane, Tasi-tolu no Tibar.

Notísia relevante:Dadus Provizóriu: Timor-oan Iha Kuarentena no Auto-Kuaretena Hamutuk 1.231

Kona-bá kuarentena iha 15 mak hanesan, otél Carla Mension, otél Colmera, otél YQ, otél Funan Buras, otél Dili, otél Timing,  otél Luxury, otél Audian, otél Fantija, INAP, uma aluga Madre Salesiana Comoro, otél Chongti, otél Timor foun hudi-laran, Regal Apartament no otél Time Square.

Diretór Nasionál Sebisu Kooperativu, Ministériu Saúde, Marcelo Amaral, hateten maski iha otél no edifísiu públiku 27 ne’ebé Governu utiliza ona, maibé to’o agora iha kazu lizeiru barak, nune’e abitante-sira halo pedidu atu halo auto-izolamentu iha uma.

Maski la temi númeru detalla, maibé hosi pedidu ne’ebé iha, ekipa saúde halo observasaun direta, bainhira fatin sufisiente MS autoiza hodi halo auto-izolamentu iha idaidak-nia uma, no ekipa kontinua halo monitorizasaun.

“Sira ne’ebé iha síntoma mak ita lori ba izolamentu, hodi hetan tratamentu médiku,” Marcelo Amaral hateten ba jornalista-sira iha kna’ar fatin, tersa ne’e.

Fatin ne’ebé Governu utiliza ba kazu ho síntoma moderadu mak hanesan iha Tasi-tolu grupu A no B, kazu grave iha Vera Cruz, kazu krítiku iha antiga ospitál Lahane.

MS mós sei koordena ho autoridade lokál-sira atu bele halo sensibilizasaun kona-bá kazu lizeiru, hodi halo auto-kuarentena iha uma, bainhira iha ona síntoma mak halo transferénsia ba  izolamentu.

Governu kontinua identifika fatin iha Dili, koordena ho kompañia-sira ne’ebé iha fatin no rai atu bele disponibiliza ba fatin izolamentu, bainhira númeru kazu moderadu aumenta.

To’o ohin, Sala Situasaun, Sentru Integradu Jestaun Krize (SIJK), rejista kazu pozitivu COVID-19 hamutuk 167, rekoperadu 163 no kazu ativu 2.630.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here