Inundasaun iha Ponte Comoro 3, domingu (04/04). Imajen TATOLI/António Gonçalves

DILI, 01 juñu 2021 (TATOLI)Governu hamutuk no parseiru umanitáriu inklui Organizasaun Nasaun Unida (ONU), lansa apelu konjuntu ida hodi apoia fundu millaun $32 hodi responde nesesidade umanitária no ajuda prosesu rekuperasaun antesipada to’o dezembru 2021.

Inisiativa ne’e mosu tanba haree ba dezastre naturál iha 04 abríl 2021 ne’ebé afeta tebes ba família barak iha Dili no munisípiu seluk inklui infraestrutura públika no privada.

“Apelu ne’e husu millaun $32,7, kompostu hosi millaun $8,8 ba nesesidade imediata no millaun 23,9 ba nesesidade kurtu prazu, ne’ebé sei ajuda diretamente ema hamutuk 65.000, hodi fó benefísiu indiretamente ba populasaun hotu ne’ebé afetada inundasaun ne’e,” refere nota ne’ebé Agência TATOLI asesu, tersa ne’e.

Apelu ne’e define atividade prioritária sira hodi aborda lakuna krítika hamutuk setór sia hanesan, Koordenasaun no Jestaun ba Akapamentu no Abrigu ba Emerjénsia, Bee, Saneamentu no Ijiene, Jéneru no Protesaun, Aihan segura, Nutrisaun, Saúde, Edukasaun, rekuperasaun sedu no meiu subsisténsia, no mós lojístika ba emerjénsia.

Nune’e, Governu aloka ona millaun $65,2 liuhosi Fundu Kontijénsia, enkuantu parseiru umanitáriu sira inklui ONU kompromete ona millaun $10,7 hodi apoia esforsu ba resposta sira.

Hafoin avaliasaun rápida ne’ebé konklui ona lakuna krítika ba finansiamentu, presiza bele atende nesesidade komunidade afeta inundasaun hodi inisia hikas fali prosesu rekuperasaun.

Maski Governu Timor-Leste halo ona esforsu maka’as atu responde ba nesesidade urjente populasaun sira ne’ebe afetadu inundasaun no aumenta ona Fundu Kontijénsia hodi implementa programa iha termu badak no naruk hodi rekupera kalamidade ida-ne’e, maibé sei iha lakuna finanseira ne’ebé signifikativu ne’ebé presiza priense.

“Tanba ne’e, bolu parseiru dezenvolvimentu sira hotu atubele halo kontribuisaun voluntária hodi bele ajuda Timor-Leste hasa’e nia kapasidade atu responde no rekupera katastrofe dezastrosa ida ne’e,” nota Governu subliña.

Planu resposta ba inundasaun iha tinan 2021 ne’e, Timor-Leste sei fasilita koordenasaun entre Governu no parseiru umanitáriu sira iha fulan hitu tuir mai, hahú hosi maiu to’o dezembru 2021.

Planu ne’e dezenvolventu konjuntu entre Governu Timor-Leste ho apoiu hosi Gabinete Koordenadór Rezidente ONU no parseiru umanitáriu sira hotu.

Parseiru sira ne’ebé partisipa iha planu reposta konjunta durante fulan hitu ne’e, kompostu hosi organizasaun hamutuk 20, Ajénsia ONU na’in-sia, parseiru umanitáriu 63, ministériu no departamentu hamutuk 14.

Dadus ikus hatudu katak, família afetadu inundasaun hamutuk 33.835, ne’ebé númeru mai hosi munisípiu hotu no ema mate hamutuk 44.

Enkuantu, estragu infraestrutura públika hanesan edifísiu inklui instalasaun saúde, sentru kuarentena no izolamentu COVID-19.

Iha área agrikultura, dezastre naturál ne’ebé akontese estraga área agrikultura hamutuk ektare 2.163.

Populasaun afetada hotu sei benefisia direta no indereta hosi resposta ne’e, inklui reabilitasaun infraestrutura públika sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here