Negosiante fa’an ai-han lokál iha bazar tradisionál, iha kapitál Dili, 16 outubru 2020. Imajen TATOLI/António Gonçalves

DILI, 01 juñu 2021 (TATOLI)-Governu liuhosi Ministériu Koodernadór Asuntu Ekonómiku (MKAE) kompromete atu kria lejizlasaun hanesan lei seguransa alimentár hodi bele regula no kontrola ai-han sira tuir padraun saúde públika iha Timor-Leste.

Ministru Koordenadór Asuntu Ekonómiku, Joaquim Amaral, konsidera rekomendasaun hosi Parlamentu Nasionál (PN) liuhosi Komisaun D, ne’ebé trata asuntu Ekonomia no Dezenvolvimentu, pertinente tebes atubele estabelese lejizlasaun hodi garante kualidade ai-han iha rai-laran.

“Ita presiza duni iha lejizlasaun ida, liuliu lei seguransa alimentár atu fó forsa ba Autoridade Inspesaun no Fiskalizasaun Atividade Ekonómika no Sanitária (AIFAESA) halo nia funsaun hodi fó seguransa no kontrola kualidade ai-han iha rai-laran,” Mininstru Joaquim hateten hodi responde ba rekomendasaun Komisaun D nian, iha Colmera Dili, tersa ne’e.

Notísia relavante: Komisaun D rekomenda Governu kria lei seguransa alimentár

Tuir governante ne’e, dekretu-lei ne’e sei kontrola produtu ne’ebé konsumidór sira atu sosa tenke prenxe padraun liuhosi kualidade no kuantidade.

Daudaun ne’e, MKAE hahú forma ekipa atu halo eleborasaun dekretu-lei seguransa alimentár hodi halo diskusaun iha Konsellu Ministru no Parlamentu Nasionál.

“Ita hahú ona halo diskusaun ba dekretu lei seguransa alimentár ne’e no ita iha previzaun tinan ne’e (2021) atu avansa ho lei ne’e hodi hetan aprovasaun hodi bele regula ai-han iha Timor-Leste,” nia akresenta.

Kona-ba Laboratóriu, Ministru fó ona instrusaun ba AIFAESA atu buka fatin halo konstrusaun iha tinan oin (2022).

“Ita serbisu atu AIFAESA bele hetan fasilidade, liu-liu laboratóriu atu fasilita serbisu halo teste ba matéria ka ai-han atubele proteje direitu ba konsumidór sira,” nia hatutan.

AIFAESA halo ona identifikasaun ba fatin, hafoin MKAE koordena ho Ministériu Justisa atu hafasil konstrusaun laborátoriu ne’e.

“Ita kuandu hetan fatin fasil ona atu konstrui laboratóriu tanba ita tau osan, maibé laiha fatin ita labele ezekuta. Nune’e AIFAESA buka hela fatin, ne’ebé ita propoin ba Orsamentu Jerál Estadu 2022 atu konstrui,” Ministru subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here